Улаанбаатар
Украины асуудлаарх Мальтын уулзалт үргэлжилж байна
ДЭЛХИЙН МЭДЭЭ | УЛС ТӨР
ЛОНДОН, 2023 оны аравдугаар сарын 29 /ВВС/. Украины асуудлыг энхийн замаар
зохицуулах тухай сэдвээр Мальт улсад болж буй олон улсын хурлын эхний өдрийн
үйл ажиллагаа дууслаа.
Тус уулзалтад нийт 66 улсын гадаад бодлого, үндэсний аюулгүй байдлын асуудал эрхэлсэн зөвлөхүүд оролцож, Украины дэвшүүлсэн “энхийн томьёоллыг” хэлэлцэж байна.
Энэхүү “энхийн томьёоллыг” Ерөнхийлөгч В.Зеленский 2022 оны
11 дүгээр сард болсон “Их20”-ийн уулзалтын үеэр анх танилцуулсан юм. 10 зүйл
заалт бүхий төлөвлөгөөнд Украины нутгаас, түүний дотор Крымээс Оросын цэргийг
гаргах, цэргийн гэмт хэрэгтнүүдийг шийтгэх, нөхөн төлбөр төлөх гэх мэт асуудлыг
тусгажээ.
Украины хувьд тус хуралд аль болохоор олон улс орныг хамруулан
оролцуулахыг хичээж байгаа бөгөөд ингэснээр Барууны холбоотнуудаас гадна “Дэлхийн
Өмнөд хэсэг”-ийн /гуравдагч ертөнцийн гэгдэж байсан улсууд/ дэмжлэгийг
авах зорилготой юм. Мальтын уулзалтад оролцож буй Украины төлөөлөгчдийг Ерөнхийлөгчийн Тамгын газрын дарга Андрей Ермак тэргүүлж байна.
Хуралд Оросын төлөөлөгчид оролцоогүй бөгөөд тус улс Украины “энхийн
томьёоллыг” зөвшөөрөхгүй байгаа юм. Оросын ГХЯ-ны төлөөлөгч М.Захарова уг
хурлыг “илт Оросын эсрэг чиглэсэн үйл явдал”нэрлэсэн байна.
Хуралд оролцогчдын жагсаалтыг албан ёсоор гаргаагүй боловч Reuters ба AFP агентлагуудын мэдээлснээр, Хятадын төлөөлөгчид оролцоогүй ажээ. Хятад улс өмнө нь Саудын Арабын Жидда хотод болсон уулзалтад оролцсон юм. Жиддагийн хуралд 40 орчим улсын төлөөлөгчид ирсэнтэй харьцуулахад оролцогчдын тоо илт нэмэгджээ.
AFP агентлагийн мэдээлснээр, зохион байгуулагчдын хувьд, тус
хурлыг хамтарсан мэдэгдэлд гарын үсэг зурснаар дуусгахыг хичээж байна. Өмнө нь
Жидда ба Копенгагенд болсон хурлуудын төгсгөлд ийм баримт бичгийг гаргаагүй юм.
Reuters агентлагийн мэдээлснээр, дэлхийн улс орнуудын удирдагчдыг оролцуулсан Украины асуудлаарх өргөн хүрээтэй дээд хэмжээний уулзалтыг оны сүүлчээр зохион байгуулахыг Мальтын хуралд оролцогчдоор зөвшөөрүүлж чадна хэмээн зохион байгуулагчид найдаж байгаа ажээ.
