ЗАВХАН: Соёлын салбарын залуучууд өв соёлоо сурталчилж байна
ОРОН НУТГИЙН МЭДЭЭ | ЗАВХАН![](/files/6698a8e7ef8b2.jpeg)
Улиастай, 2024
оны долоодугаар сарын 18 /МОНЦАМЭ/. Завхан аймаг соёлын аялал жуулчлалыг
сурталчлах зорилготой хоёр өдрийн хөтөлбөр бүхий контент бэлтгэх аяллыг анх удаа зохион
байгуулжээ.
Энэ аяллыг Түдэвтэй сумын Соёлын төвөөс санаачилж Жалханз хутагт Ц.Дамдинбазарын мэндэлсний 150 жил, Дилова хутагт Б.Жамсранжавын мэндэлсний 140 жилийн тэгш ойн үйл ажиллагааны хүрээнд Тосонцэнгэл сумын Соёлын төв болон Завхан аймгийн Соёлын салбарын Залуучуудын хөгжлийн зөвлөл хамтран зохион байгуулсан байна.
Тэд хоёр хутагтын өлгий нутаг болох Түдэвтэй
сумын нутгаар аялж, нутгийн иргэдийн онцлох уламжлал, өв соёлтой танилцаж гэрэл
зураг авч баримтжуулах, дүрс бичлэг, сурвалжилга, судалгаа хийжээ.
Аялалд соёл, урлагийн салбарын 50 гаруй уран бүтээлч залуучууд оролцсон бөгөөд хоёр өдрийн турш нутгийн өвлөн уламжлагчдаас ярилцлага авах, судалгаа хийх, нутаг нутгийн онцлог уламжлал ёс заншил, монгол ахуй соёлын талаарх дүрс бичлэгийг хийсэн. Соёл, уламжлалтай танилцсан энэхүү аяллын талаарх гэрэл зураг, дүрс бичлэг, ярилцлагуудыг судалгаа, баримт болгож архивлах бөгөөд олон нийтийн сүлжээнд цувралаар нийтлэх юм. Ингэснээр монгол ахуй, нутаг нутгийн онцлог, уламжлалт өв соёлоо хүүхэд залуучууд иргэдэд таниулан сурталчлах, өвлүүлэн уламжлуулах юм гэж Завхан аймгийн Соёл урлагийн газраас мэдээлэв.
Соёлын аялал жуулчлалыг хөгжүүлэх хөтөлбөрт зураач, дуучин, бүжигчин, морин хуурч, яруу найрагч, гэрэл зурагчин гээд соёлын салбарт ажилладаг залуучууд оролцжээ
Түдэвтэй сумын Ойгон нуурыг тойрсон гурван хутагтын төрсөн бууц, гэрэлт хөшөөг хамарсан
газруудаар тойрон аялжээ
Анх удаа зохион байгуулсан соёлын аялал жуулчлалын хоёр өдрийн хөтөлбөрийн төгсгөлд
Ойгон нуурын эрэг дээр нуурын
домгийг жүжигчилсэн хэлбэрээр үзүүлж, уран бүтээлчид ардын язгуур урлагийн бүрэн хэмжээний тоглолт хийжээ.
Уламжлалт монгол ахуйтай танилцаж адууны соёлын талаар иргэдэд мэдээлэл өглөө
Адууг хэрхэн малладаг, адууны тоноглол хийдэг уламжлалт аргаасаа малчид үзүүлэв
Нутгийн малчдын адуу тамгалах ёс, адууны тамганы бэлгэдлийн талаарх малчдын үзүүлбэр
Адууны тоноглолын онцлог учир холбогдлыг таниулж байна
Малын арьс шир элдэх ёс, уламжлалт аргуудаас үзүүлэв
Гүү саах
Сүү цагаан идээ борлуулах уламжлалт арга, технологийн талаар малчин эмэгтэйчүүд таниулав
Сүү цагаан идээ боловсруулах уламжлалт арга, технологийн талаар малчин эмэгтэйчүүд таниулав
Малын ноосоор дээс томох, уламжлалт аргуудаасаа малчин эмэгтэйчүүд үзүүлэн таниулав