ВАШИНГТОН, 2024 оны наймдугаар сарын 1 /CNN/. Америкийн усанд сэлэлтийн домогт тамирчин Кэти Ледецки дахин алтан медаль хүртлээ. Лхагва гарагт 1500 м-ийн чөлөөт сэлэлтийн төрөлд өрсөлдөгчдөө хол орхин түрүүлсэн тэрбээр өөрийн тогтоосон Олимпын дээд амжилтыг эвдэж, 15:30.02 минутад буюу хамгийн ойрын өрсөлдөгчөөсөө бүтэн 10 сек-ийн өмнө барианд оржээ.

К.Ледецки одоо нутаг нэгт тамирчин Женни Томпсонтой Олимпын усанд сэлэлтийн төрөлд хүртсэн алтан медалийн тоогоороо (найм) тэнцэж байна. К.Ледецки мөн Олимпоос нийт 12 медаль хүртсэн амжилтаараа Ж.Томпсон, Дара Торрес нартай эн зэрэгцэж байна.

Лхагва гарагт мөн Францын Леон Маршан хоёр цаг орчмын хугацаанд хоёр алтан медаль хүртлээ. Тэрбээр 200 метрийн эрвээхэй сэлэлтийн төрөлд Олимпын дээд амжилт тогтоож, дараа нь 200 метрийн мэлхий сэлэлтийн төрөлд оролцохдоо дахин Олимпын дээд амжилтыг шинэчилжээ. Ингэснээр ням гарагт 400 метрийн ганцаарчилсан сэлэлтийн төрөлд түрүүлсэн тэрбээр Парисын наадмын гурав дахь алтан медалиа энгэртээ зүүлээ.

Харин Хятадын усанд сэлэгч Пан Жанлегийн хувьд 100 метрийн чөлөөт сэлэлтийн төрөлд дэлхийн дээд амжилтыг эвдсэнээр лхагва гаргийн тэмцээнүүд өндөрлөлөө. Тэрбээр 46.40 секундэд барианд орсноор өөрийн эзэмшиж байсан дээд амжилтаа 0.4 секундээр ахиулжээ.

Ийнхүү Парисын Олимпын наадмын хамгийн сэтгэл хөдөлгөм гэрэл зургуудыг та бүхэнд танилцуулъя.

Америкийн усанд сэлэлтийн тамирчин Кэти Ледецки лхагва гарагт 1500 м-ийн чөлөөт сэлэлтийн төрөлд Олимпын найм дахь алтан медалиа хүртсэнээ баярлан тэмдэглэж буй агшин

Испанийн алдарт теннисчин Рафаэль Надаль нутаг нэгт Карлос Алкаразын хамт шөвгийн наймд АНУ-ын Остин Крайчек, Ражеев Рам нартай тоглож хожигдсоныхоо дараа үзэгчидтэй салах ёс гүйцэтгэлээ. Бэртэл гэмтлийн улмаас түүний теннисчний замнал цаашид хэрхэх нь тодорхойгүй байна.

Эмэгтэйчүүдийн триатлоны тэмцээний үеэр тамирчид Сена мөрөн рүү шумбалаа. Усны чанартай холбоотой асуудлын улмаас эрэгтэйчүүдийн триатлоны тэмцээнийг нэг өдрөөр хойшлуулснаар эмэгтэйчүүдийнхтэй нэг өдөр боллоо.

Америкийн реппер Снуп Догг элсний волейболын тэмцээнийг үзэн бүжиглэх үеэрээ Келли Чений зурагтай футболк өмссөн байлаа

Сингапурын тамирчин Зен Жянь ширээний теннисний тэмцээний үеэр анхаарлаа төвлөрүүлж буй нь 

Францын дугуйчин Энтони Жанжан BMX дугуйн чөлөөт үзүүлбэрийн үеэр. Тэрбээр хүрэл медаль хүртжээ

Өмнөд Солонгосын ширээний теннисчин Лим Жун Хун долоодугаар сарын 30-ны өдөр багийн хамтрагч Шин Ю Бин болон Хятад, Умард Солонгосын багуудын тамирчдын хамт медалийн тавцанд сэлфидэж буй агшин. Лим, Шин нар хүрэл медаль хүртсэн бол зүүн талд мөнгөн медаль хүртсэн Умард Солонгосын Ри Жон Сик, Ким Кум Ён нар, тэдний дунд алтан медалийн эзэд болох Хятадын Ван Чучин, Сун Инша нар зогсож байна.

Францын тамирчин Ауриан Малло-Бретон 30-ны өдөр Өмнөд Солонгосын багтай хийсэн тоглолтын дараа хүү Матисаа тэвэрч буй агшин

Бразилын серфингийн тамирчин Габриэль Медина 29-ний даваа гарагт 9.90 оноо авсан үзүүлбэрээ үзүүлснийхээ дараа далайн давлагаан дотроос хуруугаа гозойлгон гарч ирж буй агшин

Япон, АНУ-ын сагсанбөмбөгчид тоглолтын үеэр

Эйфелийн цамхгийн хажууханд элсний волейболын тэмцээн болж байна

Украины туялзуур сэлэмчин Ольга Харлан 29-нд хүрэл медалийн төлөөх тулаандаа ялснаар Парисын Олимпын анхны медалийг эх орондоо авчирлаа.

АНУ-ын довтлогч Тринити Родман долоодугаар сарын 28-нд америкчууд 4:1-ээр хожсон тоглолтын үеэр Германы Александра Поппын дээгүүр харайж буй агшин

Австралийн тамирчин Жессика Фокс долоодугаар сарын 27-нд каяак завины ганчаарчилсан төрөлд өрсөлдөж буй нь

Парисын оршин суугчид тамирчдын парадыг гэрийнхээ цонхоор үзэхээр хүлээж байна

Сена мөрнөөр завь өнгөрч буй үед Эх дагинын сүмийг дээрээс нь харуулж буй агшин. 2019 онд гал түймэрт өртсөнөөс нь хойш анх удаа сүмийн хонхыг нээлтийн ёслолын үеэр дуугаргалаа. Сүмийн сэргээн босголтын ажил 90 хувьтай явагдаж байна.

Долоодугаар сарын 23-ны мягмар гаргийн шөнө Эйфелийн цамхаг дээр суурилуулсан Олимпын цагиргуудын дундуур сар харагдаж буй агшин

Францын Спортын сайд Амели Оудеа-Кастера, Олон улсын Олимпын хорооны Ерөнхийлөгч Томас Бах нар долоодугаар сарын 19-нд Парист эв нэгдлийн бэлгэдэл болох тагтаануудыг нисгэлээ.