Улаанбаатар
БАЯН-ӨЛГИЙ: А.Бегарысыг 100 хувийн саналаар аймгийн ИТХ-ын даргаар сонголоо
ОРОН НУТГИЙН МЭДЭЭ | БАЯН-ӨЛГИЙ
Өлгий, 2024 оны аравдугаар сарын 28 /МОНЦАМЭ/. Баян-Өлгий аймгийн ИТХ-ын анхдугаар хуралдаан үргэлжилж байна.
Хуралдааны эхэнд аймгийн Сонгуулийн хорооны дарга А.Серикболат 2024 оны сонгуулийн үр дүнг танилцуулав.
Үүний дараа аймгийн ИТХ-ын төлөөлөгчөөр сонгогдсон 41 төлөөлөгчийн бүрэн эрхийг хүлээн зөвшөөрөх тухай санал хураалт явуулж, 100 хувийн саналаар баталлаа.
Хэлэлцэх асуудлын дарааллын дагуу төлөөлөгчид аймгийн ИТХ-ын даргад нэр дэвшүүлэх асуудлыг хэлэлцэв. Аймгийн ИТХ дахь олонхын бүлгээс тус аймгийн Ардчилсан намын дарга А.Бегарысын нэрийг аймгийн ИТХ-ын даргад нэр дэвшүүлэв. Хуралдаанд оролцсон төлөөлөгчдийн 100 хувийн саналаар А.Бегарысыг аймгийн ИТХ-ын даргаар сонголоо.
А.Бегарыс нь 1992 онд Баян-Өлгий аймгийн Толбо суманд төрсөн. Эхнэр, хоёр хүүхдийн хамт амьдардаг. 2015 онд ШУТИС-ийг барилгын инженер мэргэжлээр төгсөж, 2019 онд Бүгд Найрамдах Казахстан Улсын Х.Сатпаевын нэрэмжит Политехникийн Их Сургуульд техникийн ухааны магистрын зэрэг хамгаалжээ.
Тэрээр 2017-2021 онд “Назар авто”
компанийн гүйцэтгэх захирал, 2021 оноос “Мөстийн ундарга” компанийн гүйцэтгэх
захирлаар, 2023 оноос Аймгийн Ардчилсан намын даргаар тус тус томилогдон
ажиллаж байна.
