Улаанбаатар
Засгийн газрын тусгай сангийн тухай хуулийг батлав
МОНГОЛЫН МЭДЭЭ | УЛС ТӨР
УИХ-ын чуулганы хуралдаанаар Засгийн газрын тусгай сангийн тухай хуульд нэмэлт, өөрчлөлт оруулах тухай хуулийг батлав.
Засгийн газрын тусгай сангийн тухай хуульд жижиг, дунд үйлдвэрийг хөгжүүлэх хөнгөлөлттэй зээл олгох үйл ажиллагааг зохицуулдаг. Гэвч ч зээлийг ямар шалгуураар олгох, зээл хүсэгч ямар баримт бичиг бүрдүүлэх, төслийг сонгон шалгаруулахад ямар журам баримтлах зэрэг асуудлыг орхигдуулсан. Тиймээс Жижиг, дунд үйлдвэрийг хөгжүүлэх сангаас олгох хөнгөлөлттэй зээлийн үйл ажиллагааг зохицуулах журам батлах эрхийг жижиг, дунд үйлдвэрийн асуудал эрхэлсэн Засгийн газрын гишүүнд олгохоор тусгасан байна. Хууль баталснаар зээл хүсэгчдэд тавих шаардлага, шалгаруулалтын ажиллагаа, бүрдүүлэх материал зэрэг асуудал тодорхой болно гэж Засгийн газар үзжээ.
Хуулийн төсөлтэй холбогдуулан асуулт асуух, үг хэлэх гишүүн байсангүй. Ийнхүү санал хураалт явуулахад хуралдаанд оролцсон гишүүдийн 73.5. хувь дэмжиж, батлав. Хуулийг баталсан өдрөөс буюу өнөөдрөөс эхлэн дагаж мөрдөх юм.
Ч.Ариунболд
