Улаанбаатар
Хаваржилт хүнд байгаа сумын зорилтот бүлгийн малчдад тусламж хүргэв
ОРОН НУТГИЙН МЭДЭЭ | АРХАНГАЙ
Архангай /МОНЦАМЭ/. Архангай аймгийн Засаг даргын 2017 оны А/46 дугаар захирамжаар хүндхэн өвөлжсөн сумдын хаваржилтын нөхцөл байдалтай танилцахаар аймгийн Онцгой байдлын газар, Ус цаг уур, орчны шинжилгээний алба, Эрүүл мэндийн газраас ажлын хэсэг гарч 3-р сарын 30, 31-ний өдрүүдэд ажиллав.
Ажлын хэсгийнхэн Эрдэнэмандал, Жаргалант, Цэцэрлэг сумдын зорилтот бүлгийн буюу олон хүүхэдтэй өрх толгойлсон, нэн ядуу, ганц бие ахмад настай, хөгжлийн бэрхшээлтэй, эмнэлгийн тусламж үйлчилгээ авах шаардлагатай малчин өрхүүдийг сонгож орсон байна.
Энэ үеэр аймгийн Нэгдсэн эмнэлгийн эмч болоод сум, багийн эмч нар хамт явж 70 гаруй өрхийн 120 гаруй хүнд эрүүл мэндийн тусламж үйлчилгээ үзүүлжээ. Эдгээр малчин эмчид үзүүлэх гэж аймаг битгий хэл сум ч орж чаддаггүйгээ хэлээд баярлаж байгаагаа илэрхийлсэн байна.
Мөн ОБГ-ын зүгээс цас ихтэй, хаваржилт хүндэрсэн багуудыг сонгосон учраас сум бүрт НҮБ-ын эрүүл ахуйн 18 багцийг, нийт 54 багц, ОБЕГ болон Улаан загалмайн шугамаар ирсэн тусламжийн бараанаас шаардлагатай гэсэн өрхүүддээ өгсөн байна. Улсын Онцгой комиссын шийдвэрээр Цэцэрлэг суманд 30 тн тэжээлийг 50 хувийн хөнгөлөлттэй үнээр хүргэж өгч, буулгажээ.
Б.Гэрэлт-Од
