Улаанбаатар
Ё.Лхагвасүрэн: Амиа алдсан бүсгүйн хэргийн шалтгааныг тодруулахаар ажиллаж байна
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/ Хүчирхийлүүлснээс болж 22 настай охин өндөр байшингаас үсэрч амиа алдсан хэргийн талаар тодрууллаа. ЦЕГ-ын Олон нийттэй харилцах албаны ахлах мэргэжилтэн, цагдаагийн хошууч Ё.Лхагвасүрэн ийнхүү ярьж байна.
- 22 настай бүсгүй учир битүүлгээр өндөр байшингаас үсэрч амиа алдсан мэдээлэл үнэн үү?
-Энэ хэрэг гарсан нь үнэн. Одоо хэргийг харьяа дүүргийн Цагдаагийн газар шалгаж байгаа.
-Хэрэг хэзээ гарсан бэ?
-Зургадугаар сарын 6-ны өдөр.
-Хаана болсон юм бэ?
-Энэ хэрэг Нийслэлийн Баянгол дүүрэгт гарсан. Харьяаллын дагуу Баянгол дүүргийн Цагдаагийн нэгдүгээр хэлтэс шалгаж, хэргийн шалтгаан нөхцлийг тодруулахаар ажиллаж байна.
-Талийгаач охины үхэл компанийн захиралтай холбоотой гэх мэдээлэл байна. Энэ хэр бодитой мэдээлэл вэ?
-Хэрэг мөрдөн байцаалтын явцад явж байгаа болохоор мэдээлэл өгөх боломжгүй. Захиралтай нь холбоотой асуудлын тухайд бол Хан-Уул дүүргийн Цагдаагийн нэгдүгээр хэлтэст шалгаад хариу өгнө байх.
- Өнгөрсөн тавдугаар сарын 31-ний өдөр талийгаач охин хүчингийн хэргийн хохирогч болсноо цагдаад мэдэгдэж, өргөдөл өгчээ. Гэвч өргөдлийг нь яасан нь мэдэгдэхгүй байгаа гэсэн яриа ч байна?
-Талийгаач охины өгсөн өргөдлийг Цагдаагийн газраас шалгаж байгаа. Өргөдлийн талаар ч шалгаж тодруулна.
Ж.Батсайхан
