Улаанбаатар
Сум бүр нөөцтэй байхыг даалгажээ
ОРОН НУТГИЙН МЭДЭЭ | БАЯН-ӨЛГИЙБаян-Өлгий аймагт мал өвөлжилтийн байдал хүндэрч байгаатай холбогдуулан аймгийн аюулгүйн нөөцийн эрхлэгч Ж.Аманжол мэдээлэл өгөв.
Тэр ярихдаа, Манайд 2012 оноос дөрвөн жил хуримтлуулсан өвс тэжээлийн нөөц бий. Жил жилийнхээс сар хагасын өмнө их хэмжээний цас орсоноор малчдын хүсэлтээр хорин хувийг нь борлуулахаар боллоо. Гэхдээ Сагсай, Цэнгэл, Баяннуур сумын малчид мөнгөгүй тул зээлээр юм уу малаар арилжаалан өвс тэжээл өгөөч гэж байгаа. Дээд байгууллагын зөвшөөрөлгүйгээр ингэх эрх бидэнд алга. Дээшээ асуудал тавиад байгаа. Аймгийн төв болон Дэлүүн, Булган сумдад, Сагсай сумын Даян нуурт нөөцийн агуулах, өвс тэжээлийн нөөц байгаа. Удахгүй 450 тонн хивэг орж ирэхээр болсон. Гэхдээ арван хоёрдугаар сард нэмж цас орох төлөвтэй. Байдал гамшгийн хэмжээнд хүрвэл эдгээр нөөц нь сар хэрэглэхээс хэтрэхгүй. Сум бүр 50 тонн тэжээл, 150 тонн өвсний нөөцтэй байх тухай журмын заалт бий. Уг шийдвэрийг ихэнх сум биелүүлээгүй, орон нутгийн хөгжлийн сангаа өөр хэрэгтэй хэрэггүй юманд зарцуулж байгаа дутагдал бий. Аймгийн удирдлагаас сум тус бүр гучин саяас доошгүй төгрөгийн хөрөнгөөр нөөц бэлтгэх даалгаврыг өгч байгаа. Иймд манайд болон зах зээл дээр өвс тэжээл элбэг байгаа энэ үед хангалттай бэлтгэлээ базаах нь дээр гэв.
Ш.Айзаря
