Ulaanbaatar
Солонгосын дайнд амь үрэгдсэн цэргүүдийн шарилыг хайх ажилд робот оролцуулна
ДЭЛХИЙН МЭДЭЭ | НИЙГЭМ
СӨҮЛ. /TASS/. БНСУ-ын Зэвсэгт хүчний командлал 1950-1953 оны Солонгосын дайны үеэр амь үрэгдсэн цэргүүдийн шарилыг эрж хайх ажилд автомат роботууд ашиглахаар болжээ.
KBS телевизээр мэдээлснээр, энэхүү шийдвэрийг БНСУ-ын Үндэсний батлан хамгаалах яамны “Дөрвөн стратеги ба арван даалгавар” хөтөлбөрийн хүрээнд гаргасан байна. Уг хөтөлбөрийн гол зорилго нь амь үрэгдсэн цэргүүдийн шарилыг хайх ажлын үр дүнг дээшлүүлэх аж.
Тухайлбал, эрэл хайгуулыг бие даан явуулах чадвартай роботуудыг бүтээж, ашиглахаар төлөвлөжээ. Ийм роботуудын тусламжтайгаар цэргүүд жил бүр дор хаяж 500 цэргийн шарилыг олохоор төлөвлөж байгаа бөгөөд тусгай анги нэгтгэл байгуулах юм.
БНАСАУ-тай залгаа хил орчмын цэрэггүй бүсэд Солонгосын дайны үед амь үрэгдсэн цэргүүдийн шарилыг хайх ажлыг БНСУ-ын тал дөрөвдүгээр сарын 20-нд сэргээсэн юм. Уг ажиллагааг гуравдугаар сард эхлүүлэхээр төлөвлөж байсан боловч коронавирусний халдвар тархсантай холбоотойгоор хойшлуулжээ.
