Ulaanbaatar
Пара хөнгөн атлетикийн тамирчин Г.Самбууданзанд 500,000 төгрөгийн урамшуулал олгов
ОРОН НУТГИЙН МЭДЭЭ | АРХАНГАЙ
Архангай /МОНЦАМЭ/. Аймгийн Засаг дарга Ц.Мөнхнасан пара хөнгөн атлетикийн тамирчин Г.Самбууданзанд “Олон улс, тив дэлхийн зэрэглэлийн тэмцээн, олимпийн наадамд амжилттай оролцож, медаль хүртсэн тамирчин, түүний дасгалжуулагчид урамшуулал олгох журам”-ын дагуу 500,000 төгрөгийн урамшууллыг олгож, Азийн тэмцээнд нь амжилт хүсэв.
Олимп, Азийн тэмцээнүүдийн дараа ордог “Бэйжин Гранпри” пара хөнгөн атлетикийн аварга шалгаруулах тэмцээн нь БНХАУ-ын Бэйжин хотод 2013 оноос хойш зохион байгуулагдсан бөгөөд Архангай аймгийн пара хөнгөн атлетикийн тамирчин Г.Самбууданзан энэ жил дөрөв дэх удаагаа оролцож, бөөрөнцөг шидэлтийн төрөлд 8,97 м шидэж алтан медаль, зээрэнцэг шидэлтийн төрөлд 29,71 м шидэж мөнгөн медаль тус тус хүртсэн билээ.
Ирэх сарын 6-13-нд Индонез Улсын Чакарта хотод болох пара хөнгөн атлетикийн аварга
шалгаруулах Азийн тэмцээнд бөөрөнцөг шидэлтийн төрөлд оролцох эрхээ гурав дахь
удаагаа авчээ.
Б.Гэрэлт-Од
