“Оюутолгой”-гоос Монгол Улсад жил бүр нэг тэрбум ам.доллар орж ирэх үүд нээгдэв

МОНГОЛЫН МЭДЭЭ
ariunzaya@montsame.mn
2015-12-16 14:43:46

Өнөөдөр Оюутолгой төслийн гүний уурхайн  бүтээн байгуулалтыг санхүүжүүлэх 4.4 тэрбум ам.долларын санхүүжилтийн гэрээг баталгаажууллаа.

Шангри-Ла зочид буудалд болсон Оюутолгойн далд уурхайн санхүүжилтийн гэрээнд гарын үсэг зурах ёслолд Монгол Улсын Ерөнхий сайд Ч.Сайханбилэг, Уул уурхайн сайд Р.Жигжид, “Эрдэнэс Монгол” ХХК-ийн Гүйцэтгэх захирал Б.Бямбасайхан, “Эрдэнэс Оюу Толгой” ХХК-ийн Гүйцэтгэх захирал Д.Ганболд болон “Оюу Толгой” ХХК-ийн ТУЗ-ийн дарга Г.Батсүх, “Оюу Толгой” ХХК-ийн Ерөнхийлөгч бөгөөд Гүйцэтгэх ерөнхий захирал Эндрью Вүдлэй, Рио Тинтогийн Зэс-нүүрсний группын Гүйцэтгэх захирал Жан Себастьян Жак нар оролцсон юм.

Оюутолгой төсөлд 4.4 тэрбум ам.долларын санхүүжилтийг дэлхийн 15 банк, санхүүгийн байгууллагууд олгож буйгаараа онцлогтой. Дээрх гэрээг байгуулснаар Оюутолгойн далд уурхайн бүтээн байгуулалт ирэх оны дундуур эхэлж, 5-7 жилийн хугацаанд үргэлжлэхээр болж байна. Тодруулбал Монгол Улсад жил бүр нэг тэрбум гаруй ам.долларын урсгал орж ирэх үүд  хаалга нээгдэж буйг албаныхан тодотголоо.

Монгол Улсын Ерөнхий сайд Ч.Сайханбилэг хэлэхдээ, "Өнөөдрөөс эхлэн “Оюутолгой” ямар нэгэн улс төр, Засгийн газрын асуудал биш цэвэр бизнесийн төсөл болж байгааг онцлоход таатай байна. Дэлхийн хамгийн том 15 банк, Рио Тинто компани болон Монгол Улсад зээлээ олголоо.Ингэснээр монголын хувийн хэвшлийнхэн хөрөнгө оруулах,түншээ олж авах, зээл авах үүд хаалга нь нээгдэж байна. Монголчууд бизнестээ буцан ирлээ” хэмээн онцолсон юм.

Харин Рио Тинто компанийн Зэс-нүүрсний группын Гүйцэтгэх захирал Жан Себастьян Жак, "Юуны өмнө Монгол Улсын Засгийн газар энэ ажилд тэргүүлэн оролцож буйд талархал дэвшүүлье. Хөрөнгө оруулж буй банкууд итгэл үзүүлэн санхүүжилт өгч буй нь “Оюутолгой” төслийн чансааг харуулж буйн илрэл юм. “Оюутолгой”-н уурхайг дэлхийн хэмжээний уурхай хэмээн үнэлэгдэх гэрээнд гарын үсэг зурснаараа Монголд олон эерэг өөрчлөлтүүд бий болно. Бүтээн байгуулалт, ажлын байр гээд олон ажлыг дээрх санхүүжилтээр хийнэ.  20 км газарт  хүдрийн биетийг олборлох ажил удахгүй өрнөх боломж нээгдлээ” гэв.

Мөн үеэр МҮХАҮТ-ын ерөнхийлөгч болон бизнесийн төлөөлүүд хүрэлцэн ирж "Оюутолгой" төслийг дэмжиж буйгаа илэрхийлсэн юм.

Б.Заяа

Гэрэл зургийг Т.Чимгээ

 

 

Холбоотой мэдээ