МОНЦАМЭ агентлагийн сэтгүүлч Б.Алтанхуяг “Цагаан-Уул 2018” яруу найргийн наадамд түрүүлэв

МОНГОЛЫН МЭДЭЭ | СОЁЛ УРЛАГ
boloroo8136@gmail.com
2018-11-02 16:42:32

Улаанбаатар /МОНЦАМЭ/. Монголын Залуучуудын Холбооноос жил бүр уламжлал болгон зохион байгуулдаг хайрын шүлгийн “Цагаан-Уул 2018” наадмын II шатны шалгаруулалт өнөөдөр болж, шилдгүүдээ тодрууллаа.


1991 оноос хойш 26 жилийн хугацаанд 20 дахь удаагаа зохион байгуулж буй энэхүү хайрын шүлгийн наадам нь залуу яруу найрагчдын хүсэн хүлээдэг, Монгол хэлний үгсийн сайхныг магтан таниулдаг үйл ажиллагаа болдгоороо залууст танигдсан билээ.

Энэ жилийн наадмыг “Бүтээн байгуулагч залуучуудыг хайраар хөглөе” уриан дор зохион байгуулсан бөгөөд наадамд хот, хөдөөгийн 100 гаруй найрагч шүлгээ ирүүлсэн юм. Үүнээс шилдэг 60 гаруй найрагч сүүлийн шатанд өрсөлдсөнөөс Үндэсний мэдээллийн МОНЦАМЭ агентлагийн сэтгүүлч, залуу яруу найрагч Б.Алтанхуяг түрүүлэв. Мөн Говь-Алтай аймгийн оролцогч Б.Ганхүрэл, Т.Дарханхөвсгөл, Б.Жамбалдорж, С.Очиртөмөр нар айргийн тавд багтлаа.




Ингээд залуу яруу найрагч Б.Алтанхуягийн “Цагаан-Уул 2018” наадамд түрүүлсэн шүлгийг толилуулж байна.

***

Борооны чийгтэй адилхан чиний үнэр
Сэтгэлийг минь өөртөө цонх шиг татдаг

Болжморууд нойтон далавчаараа дусал хэрчин нисэх шиг

Бодол бүрээ уран суухуйд чиний тухай дурсамжууд арилдаг


Одоо надад үлдсэн ганц хайрцаг янжуур

Охидод уншсан шүлгийн мөрүүдээс ч үнэтэй санагдах

Эл хульхан гудамжаар ус туучин алхахуй 
Амар амгалан ганцаардлыг мэдэрнэм


Харанхуйн тухай цог шиг төсөөллийг минь гартаа атгаад

Хаа нэгтээ гүйж яваа жаахан минь
Үзэсгэлэн гоо дотор чинь уй гуниг нуугддаг

Үүлс сэмэрхийг хараад л салхинд дургүй хүрдэг


Хагацалд цоо дүрүүлсэн шөнийг цолмон од сорох мөчид

Харцны чинь хүүхэн хараа томрохыг үзээд худлаа гэдгийг нь мэдсэн

Хавирган цаанаас нэг зүйл хатгуулдан өвдөж жигүүр минь хугарахад

Халуун цусаа асгаруулан байж өлмийд чинь унаад хайртай гэж хэлсэн


Даанч бидний хэн хэнд нь
Дарвуулт хөлөг шиг бардам зан заяасан

Эрхэмсэг зан, үзэсгэлэн гоо чинь хүртэл

Эхлэлээс холдож чадаагүй төгсгөл байсныг ухаарсан


Тус наадмыг Монголын Зохиолчдын эвлэл, МҮОНРТ, Залуу удирдагч сан хамтран зохион байгуулж, Ерөнхий Ивээн тэтгэгч байгууллагаар Монос групп ажилласан юм.

Дашрамд дурдахад, Үндэсний мэдээллийн МОНЦАМЭ агентлагийн залуу сэтгүүлч Б.Алтанхуяг сэтгүүл зүйн шилдэг бүтээлд олгодог 10 дахь удаагийн “Балдорж” шагналыг “Аниргүйн гүн дэх цаг хугацаа” нийтлэлээрээ хүртсэн билээ.

Холбоотой мэдээ