Улаанбаатар
Майкл Блумберг "Эдийн засгийн шинэ чуулга уулзалт"-ыг үүсгэн байгууллаа
ДЭЛХИЙН МЭДЭЭ | ЭДИЙН ЗАСАГ
СИНГАПУР. /Xinhua/. Дэлхийн эдийн засгийн шилжилтийн улмаас үүссэн сорилтуудыг хувийн хэвшлээр дамжуулан зохицуулах зорилготой "Эдийн засгийн шинэ чуулга уулзалт" анх удаа зохион байгуулагдлаа.
Засаглал, худалдаа, технологи, хотжилт, санхүү, хөрөнгийн зах зээл, уур амьсгалын өөрчлөлт зэрэг нь өчигдөр нээлтээ хийсэн тус чуулга уулзалтын үндсэн асуудал байв. Дайны дараа үүссэн байгууллагууд эдийн засгийн шинэ бүтэцтэй дасан зохицож амжаагүй, худалдааны эвслүүдэд хуваагдах эрсдэл үүсээд байгаа, хиймэл оюун ухаан ажлын байрны тоог бууруулж байгаа зэрэг нь өнөөгийн эдийн засгийн сорилтууд болоод байгаа билээ.
Энэхүү чуулга уулзалтын гол зорилго нь эдийн засгийн тулгамдсан асуудлыг зохицуулах шийдэл олж, түүний ойлголтыг нэмэгдүүлэх, эдийн засгийн шилжилтийн улмаас үүссэн сорилтуудыг зохицуулах явдал юм.
"Улс орны Засгийн газрууд дангаараа зохицуулах боломжгүй эдийн засгийн асуудлуудыг тодорхойлж, Засгийн газрууд болон бизнес эрхлэгчдийн хооронд шинэ түншлэлийг бий болгох замаар дэлхийн эдийн засгийн тогтвортой байдал, өсөлтийг хангах арга хэмжээ авах нь энэ чуулга уулзалтын зорилго юм" гэж уг чуулга уулзалтыг үүсгэн байгуулагч Майкл Блумберг мэдэгдлээ.
Тэрбээр чуулга уулзалтыг нээж үг хэлэхдээ, “Ази, Африк, Латин Америкийн хөгжиж буй орнуудын эдийн засгийн өсөлт хэдэн тэрбум хүний аж амьдралыг сайжруулж байгаа хэдий ч энэ хандлага нь худалдаа, хөрөнгийн зах зээл, оюуны өмч зэрэг салбарт шинэ сорилтуудыг үүсгэж байна” гэв.
Мөн тэрбээр, энэхүү чуулга уулзалт нь сорилтуудыг даван туулахын тулд хувийн хэвшлийн хүчийг эдийн засгийн үйл ажиллагаа, бодлоготой уялдуулах замаар дэлхийд энх тайван, хөгжил цэцэглэлтийг бий болгох зорилготой юм гэж хэлээд, эдийн засгийн үр ашгийг нэмэгдүүлж, ард иргэдийг чадваржуулах, эмэгтэйчүүд болон бусад бүлгийн хүмүүст адил боломж олгох, нүүрстөрөгчийн ялгарлыг бууруулахад хувийн хэвшил чухал үүрэгтэй гэж мэдэгдэв.
Хоёр өдөр үргэлжлэх энэ чуулга уулзалтад олон улсын нэр нөлөө бүхий 400 гаруй төлөөлөгч оролцож байна.
Дараагийн чуулга уулзалтыг ирэх жилийн 11 дүгээр сард Бээжин хотод зохион байгуулахаар төлөвлөжээ.
