Монгол, ОХУ-ын ГХЯ-д хоорондын зөвлөлдөх уулзалт боллоо

МОНГОЛЫН МЭДЭЭ | ГХЯ-НЫ МЭДЭЭ
ariunbold@montsame.gov.mn
2019-03-25 18:38:02

Улаанбаатар /МОНЦАМЭ/. Монгол, ОХУ-ын ГХЯ-д хоорондын ээлжит зөвлөлдөх уулзалт өнөөдөр боллоо.


Зөвлөлдөх уулзалтын үеэр Монгол Улс, ОХУ-ын сайн хөршийн найрсаг харилцаа нь Стратегийн түншлэлийн түвшинд идэвхтэй хөгжиж буйг онцлон тэмдэглэж, улс төр, худалдаа, эдийн засаг, хүмүүнлэгийн харилцаа болон хамтын ажиллагааны бусад асуудлаар санал солилцлоо. Тухайлбал, энэ жил хоёр орны харилцааны түүхэнд тохиож буй Халхын голын байлдааны ялалтын 80 жил, Монгол, Оросын хамтарсан “Улаанбаатар төмөр зам” нийгэмлэг байгуулсны 70 жил, Монгол Улсад атар газар эзэмшиж эхэлсний 60 жилийн ойг хамтран тэмдэглэх асуудлыг хэлэлцэв.


Сүүлийн жилүүдэд хоёр орны худалдааны эргэлт нэмэгдэж байгааг талууд онцлон тэмдэглэхийн зэрэгцээ ойрын хугацаанд Улаанбаатар хотноо зохион байгуулахаар төлөвлөж буй Монгол, Оросын Засгийн газар хоорондын комиссын ээлжит хуралдаанаар цаашид худалдаа, эдийн засгийн харилцаа, хамтын ажиллагааг өргөжүүлэх боломжуудын талаар ярилцахаар тохиролцов.


Мөн өдөр ОХУ-ын Гадаад хэргийн орлогч сайд И.Моргулов Монгол Улсын Ерөнхий сайд У.Хүрэлсүх, Гадаад харилцааны сайд Д.Цогтбаатар, дэд сайд Б.Батцэцэг нарт тус тус бараалхав.

Холбоотой мэдээ