Улаанбаатар
Ур чадвартай багш 100 сая төгрөг гардана
МОНГОЛЫН МЭДЭЭ | БОЛОВСРОЛУлаанбаатар /МОНЦАМЭ/. Монголын багш нарын VII их хурлын босгон дээр БСШУСЯ, “Боловсрол” телевиз хамтран ажиллах санамж бичигт гарын үсэг зурлаа.
Багш мэргэжлийн
нэр хүнд, үнэлэмжийг өсгөх, урамшуулах, сурагч, эцэг, эхчүүдэд ерөнхий
боловсролын мэдлэг өгөх, залуу багш нарт туршлага хуримтлуулах зорилгоор дээрх
байгууллагууд хамтран багш нарын дунд ур чадвар, заах аргын уралдаант контент
бэлтгэх болсноо зарлав. Санамж бичиг зурах ёслолд БСШУС-ын дэд сайд
Г.Ганбаяр, “Боловсрол” телевизийн захирал Н.Мэндбаяр болон холбогдох албаны
хүмүүс, уран бүтээлчид оролцлоо.
Нийслэл болон хөдөө, орон нутгийн ЕБС-ийн бага ангийн 10 мянга
гаруй багшийн төлөөллийг хамруулахын тулд уралдаант контентын нэгдүгээр шатыг
Монгол Улсын бүх сум, дүүргийн сургуулийн 1-5 дугаар ангид хичээл заадаг багш
нарын дунд зохион байгуулахаар төлөвлөсөн байна.
Сүүлийн шатанд шалгарсан 21 аймаг, есөн дүүргийн шилдэг багш
нараас Үндэсний ялагчийг тодруулж, 100 сая төгрөгөөр шагнах юм. Энэ нь багшийн
ур чадварыг анх удаа өндрөөр үнэлж буй тохиолдол болж байна.
Нэвтрүүлгийн явцад мэргэжлийн багш нарын ур чадварыг шүүгчид
төрөл бүрээр сорих бөгөөд сурагчиддаа ямар арга хэлбэрээр мэдлэг өгч, шинэ
техник, технологи, хэрэглэгдэхүүн ашиглаж буйг нь шоу нэвтрүүлгийн элементтэй
хослуулан сонирхолтой байдлаар үзүүлэхийн тулд энэ төрлийн контентод
туршлагажсан мэргэжлийн баг буюу “Боловсрол” телевизийн уран бүтээлчидтэй
хамтран ажиллахаар шийдвэрлэжээ.
