Улаанбаатар
Иргэдийг нарийн мэргэжлийн үзлэг, оношилгоонд хамруулж эхэллээ
МОНГОЛЫН МЭДЭЭ | ЭРҮҮЛ МЭНДУлаанбаатар /МОНЦАМЭ/. Нийслэлийн Засаг даргын захирамжийн дагуу “Эрүүл иргэн” аяны хүрээнд нийслэлийн 152 хорооны Өрхийн эрүүл мэндийн төвд дотор, мэдрэл, зүрх судас, ахмад настан, хүүхэд, нүд, чих хамар хоолой, хавдар, сүрьеэ, эмэгтэйчүүд зэрэг төрөлжсөн нарийн мэргэжлийн эмчийн үзлэг, оношилгоо хийж эхэллээ.
Мөн ЭХО, рентген, зүрхний бичлэг зэрэг багажийн шинжилгээ,
түргэвчилсэн оношлуураар чихрийн шижин, хөх умайн хүзүүний өмөн, хавдар, БЗДХ
зэргийг илрүүлэх цусны шинжилгээнд иргэдийг хамруулж эмчилгээ, зөвлөгөө өгч
ажиллаж байна.
Түүнчлэн иргэдийн дунд эрүүл мэндийн сургалт сурталчилгааг
идэвхжүүлэх, аливаа өвчнөөс урьдчилан сэргийлэх мэдлэг мэдээллийг нь
сайжруулах, амьдралын зөв дадал хэвшилтэй болгох, яаралтай үед үзүүлэх анхан
шатны тусламж үйлчилгээг хэрхэн хийх талаар сургах зэрэг ажлыг зохион байгуулах
юм.
Иргэдийг эрүүл мэндийн урьдчилан сэргийлэх үзлэг, оношилгоо,
эрт илрүүлэгт хамруулснаар артерийн даралт ихдэх өвчний эрт илрүүлгийн үзлэгийн
хувийг 70 хувь, чихрийн шижин өвчний эрт илрүүлгийг 60 хувьд хүргэх, зүрх
судасны өвчлөлөөс шалтгаалсан нас баралтыг 14 промиль, хорт хавдраас
шалтгаалсан нас баралтыг 12 промильд хүргэх, сүрьеэ, БЗДХ, ХДХВ/ДОХ-ын эрт
илрүүлгийн хамралт болон эмчилгээний амжилтын хувийг нэмэгдүүлэх бүрэн боломжтой
аж.
Түүнчлэн нөхөн үржихүйн насны охид эмэгтэйчүүдийн нөхөн
үржихүйн эрхтэн тогтолцооны эмгэгийг эрт үед нь илрүүлэх, эмчилж эрүүлжүүлж,
зөвлөгөө мэдээлэл өгөх, эмчийн хяналтыг сайжруулснаар эрүүл хүүхэд төрөх
боломжийг нэмэгдүүлэх юм.
Нийслэлийн хэмжээнд дөрөвдүгээр сарын 15-наас аравдугаар сарын 15-ныг хүртэл үргэлжлэх энэхүү аяны хүрээнд 2019 онд нийт 70 мянган хүнийг хамруулахаар төлөвлөжээ. Тус аяныг зохион байгуулснаар хүн амын дундах өвчлөл, эндэгдлийг бууруулах, ялангуяа эрүүл мэндийн урьдчилан сэргийлэх үзлэгээр дамжуулан халдварт халдварт бус өвчлөлөөс сэргийлэх, өвчнийг эрт үед нь илрүүлэх, цаг алдалгүй эмчилгээнд хамруулах зэрэг олон талын ач холбогдолтой аж.
