Улаанбаатар
Өрхийн эмч нарын харилцаа, хандлагад анхаарна
ОРОН НУТГИЙН МЭДЭЭ | ОРХОН
Орхон /МОНЦАМЭ/ Аймгийн хэмжээнд үйл ажиллагаа явуулдаг Өрхийн эрүүл мэндийн найман төв, хувийн хэвшлийн ортой 11 эмнэлэгтэй аймгийн Засаг дарга Д.Батлут болон Эрүүл мэндийн газрын дарга Б.Мөнхцэцэг нар 2019 онд хамтран ажиллах гэрээнд гарын үсэг зурлаа.
Энэ жил өрхийн эрүүл мэндийн төвүүдтэй байгуулж буй гэрээнд Засгийн газраас баталсан “Иргэн төвтэй төрийн үйлчилгээний жил”, Эрүүл мэндийн яамнаас дэвшүүлсэн “Инээмсэглэл эерэг хандлага” уриан дор эмч мэргэжилтнүүдийн харилцаа, хандлагад чиглэсэн заалт цөөнгүй оржээ. Мөн орон нутгийн төсвөөс ӨЭМТ-үүдэд тоног төхөөрөмжийн дэмжлэг үзүүлэх асуудлыг тусгасан байна.
Өнгөрсөн онд өрхийн эмнэлгүүдэд орон нутгаас хийсэн хөрөнгө оруулалтын хэмжээгээрээ Орхон аймаг улсын хэмжээнд тэргүүлсэн. Ингэснээр манай аймгийн өрхийн эмнэлгүүдэд цус, шээс зэрэг найман төрлийн шинжилгээг авдаг болж, яаралтай түргэн тусламжийн авто машинаар бүрэн хангагдаж чадсан юм. Түүнчлэн ӨЭМТ-үүдийн дархлаажуулалт, лабораторийн үйл ажиллагааг эрхлэх боловсон хүчин бэлтгэж, өрхийн эмнэлэгт ажиллаж буй бүх сувилагчийг “Өрхийн мэргэшсэн сувилагч” болгон бэлтгэжээ.
Мөн холбогдох мэргэжлийн байгууллагууд Орхон аймгийг “Жишиг өрхийн эмнэлэг”-тэй аймгаар тодруулсан байна. Ийнхүү энэ онд дахин гэрээ байгуулснаар дээрх ажлууд тогтвортой үргэлжилж, чанар, үзүүлэлт нь улам сайжирна гэж үзэж буйгаа салбарын мэргэжилтнүүд хэллээ.
