"Хил хязгааргүй хөлбөмбөг" багийнхан орон нутагт хүрээгээ тэлжээ
МОНГОЛЫН МЭДЭЭ | СПОРТУлаанбаатар /МОНЦАМЭ/. Швейцарын “Хил Хязгааргүй Хөлбөмбөг” буюу “Football Without Border” баг Монгол Улсад айлчилсан дөрөв хоногийн хугацаандаа Сүхбаатар, Төв аймагт нөхөрсөг тоглолт хийжээ.
Тодруулбал, энэ сарын 2-нд Баруун-Урт хотод Сүхбаатар аймгийн багтай, 4-нд Зуунмод хотод "Төв буганууд" клубтэй нөхөрсөг тоглолт хийж харилцан туршлага солилцлоо.
"Хил хязгааргүй хөлбөмбөг"-ийн баг маргааш буюу долоодугаар сарын 6-ны 19 цагт МХБХ-ны ногоон талбайд Монголын үе үеийн шигшээ багийн "Мөрөөдлийн баг"-тай хүч үзнэ.
Дэлхийн орон орноор явж хөлбөмбөгийн гайхам сайхныг бусадтай хуваалцдаг энэ багтай тоглох "Мөрөөдлийн баг"-ийг үндэсний шигшээ багийн дасгалжуулагч асан И.Отгонбаяр удирдана.
Энэ багт Болдын Буман-Учрал, Доноровын Лүмбэнгарав, Баясгалангийн Гарьдмагнай зэрэг үе үеийн шилдгүүд багтсан юм.