Улаанбаатар
Энэ хичээлийн жилд 38 мянга гаруй хүүхэд нэгдүгээр ангид элсэн орно
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. 2019-2020 оны хичээлийн жил эхэллээ. Энэ хичээлийн жилд нийслэлд төрийн өмчийн 241, төрийн бус өмчийн 454 цэцэрлэгт 124 372 хүүхэд сургуулийн өмнөх боловсрол эзэмшинэ.
Харин нийслэлийн ерөнхий боловсролын төрийн өмчийн 138,
төрийн бус өмчийн 115 сургуульд 294 084 хүүхэд суралцах юм. Эдгээр хүүхдийн 38
232 нь нэгдүгээр ангид элсэн орж буй.
Нийслэлийн ИТХ-ын дарга Р.Дагва, Тэргүүлэгчдийн Нарийн
бичгийн дарга Б.Батбямба тэргүүтэй холбогдох албаныхан Сүхбаатар дүүргийн I
сургуулийн хичээлийн шинэ жилийн нээлтэд оролцлоо.
Нээлтийн үеэр
нийслэлийн ИТХ-ын дарга Р.Дагва боловсролтой, үндэсний ёс заншлаа дээдэлж, зөв
төлөвшилтэй, шинэ үеийн хариуцлагатай иргэдийг төлөвшүүлэх эрхэм үүргийг
хариуцлагатай авч яваа багш, ажилтнуудад баярын мэнд дэвшүүлж, тус сургуулийн
босгыг алхан орж буй 200 гаруй хүүхэд болон ирэх хавар сургуулиа төгсөх
сурагчдад сурлагын өндөр амжилт хүссэн юм. Мөн тэрбээр тив, олон улсын хэмжээний
олимпиадаас алтан, мөнгө, хүрэл медаль хүртэж эх орныхоо нэрийг дэлхийд
мандуулсан I сургуулийн сурагчдад талархал илэрхийлэв.
Дашрамд дурдахад, сургууль, цэцэрлэгийн хүртээмжийг
дээшлүүлэх Засгийн газрын болон нийслэлийн Засаг дарга бөгөөд Улаанбаатар хотын
Захирагчийн 2016-2020 оны үйл ажиллагааны хөтөлбөрт тусгасан зорилтыг
хэрэгжүүлэх хүрээнд улс, нийслэл, дүүрэг, гадаадын зээл, тусламжийн хөрөнгөөр
энэ жил нийслэл хотод есөн сургууль, 15 цэцэрлэг, спорт заалны гурван барилгыг
ашиглалтад оруулаад байна. Мөн
өнгөрсөн хичээлийн жилд гурван ээлжээр хичээллэж байсан сургуулиудыг хоёр
ээлжинд шилжүүлсэн аж.
