Д.Эрдэнэбат: Үндсэн хуулийн төсөлд тусгах саналаа татаж, хэлэлцүүлэгт оролцохгүй

Монголын мэдээ | Улс төр
munkhbaatar@montsame.gov.mn
2019-09-09 15:13:53

Улаанбаатар /МОНЦАМЭ/. Монгол Улсын Үндсэн хуульд оруулах нэмэлт, өөрчлөлтийн төсөлд тусгахаар УИХ дахь АН-ын зөвлөлөөс 25 санал гаргасныг УИХ-ын ээлжит бус чуулганаар дөрвийг нь үлдээж, бусдыг нь дэмжээгүй тул тус зөвлөл бүх саналаа татаж, Үндсэн хуульд оруулах нэмэлт, өөрчлөлтийн хэлэлцүүлэгт оролцохгүй гэдгээ өнөөдөр мэдэгдэв.


УИХ дахь АН-ын зөвлөлийн дарга Д.Эрдэнэбат, "Манай зөвлөлөөс Монгол Улсын Үндсэн хуульд оруулах нэмэлт, өөрчлөлтийн төсөлд тусгахаар 25 санал гаргаж, УИХ-д хүргүүлсэн. Гэвч төслийн хоёр дахь хэлэлцүүлгийн явцад ихэнх санал маань унасан. Бидний оруулсан саналд, Ерөнхийлөгчийг УИХ болон орон нутгийн ИТХ-ын өргөтгөсөн хуралдаанаас сонгох, Сонгуулийг холимог тогтолцоогоор явуулж, намын хариуцлага, зохион байгуулалтыг сайжруулах, УИХ-ын гишүүний хариуцлагыг дээшлүүлэх, шүүхийн хараат бус, бие даасан байдлыг хангах санал байсан. Мөн сумын Засаг даргаа иргэд сонгох, гүйцэтгэх засаглалыг чадавхжуулж, Засгийн газрын гишүүн УИХ-ын гишүүн байхыг хориглох, Засгийн газрын өр 60 хувиас хэтрэхгүй байх зэрэг санал гаргаад байв. Эдгээрийг УИХ-аар дэмжээгүй тул дээрх саналаа татаж, Үндсэн хуульд оруулах нэмэлт, өөрчлөлтийн төслийн хэлэлцүүлэгт оролцохгүй" хэмээв. 


Харин УИХ-ын гишүүн, АН-ын дарга С.Эрдэнэ Ерөнхий сайдад асуулга хүргүүлж байгаа талаар мэдээлэв. Тэрбээр, Эрдэнэт үйлдвэрт 150 сая ам.долларын нууц гэрээ хийгдсэн тухай ЗГХЭГ-ын дарга Л.Оюун-Эрдэнийн мэдээллийн дагуу тайлбар хүсэж байгаагаа онцоллоо. 


"Эрдэнэт" үйлдвэрийн онц байдлын асуудлаар Ардчилсан намын дарга С.Эрдэнэ Монгол Улсын Ерөнхий сайд У.Хүрэлсүхэд асуулга хүргүүллээ. Асуулга бүрэн эхээрээ: 

Монгол Улсын Засгийн газар 2019 оны 3 дугаар сарын 7-ны өдөр уулын баяжуулах Эрдэнэт үйлдвэрт 6 сарын хугацаатай онцгой дэглэм тогтоосон.


Онцгой дэглэм тогтоосон Засгийн газрын шийдвэрийг Засгийн газрын Хэрэг Эрхлэх Газрын дарга Л.Оюун-Эрдэнэ танилцуулахдаа “Улс орны эдийн засаг, санхүүгийн үйл ажиллагаанд нэн чухал үүрэгтэй Эрдэнэт үйлдвэрт үүсээд байгаа нөхцөл байдлыг шийдвэрлэх, үйлдвэрлэлийн хэвийн үйл ажиллагааг хангуулах зайлшгүй шаардлагатай байгааг харгалзан Эрдэнэт үйлдвэрийн ажлыг Засгийн газрын шууд хяналтад авч хэвийн үйл ажиллагааг хангах ажлуудыг хийнэ. Одоо бол үйлдвэрийн Төлөөлөн Удирдах Зөвлөл ажиллахад хүнд байдалтай байгаа. Шүүх дээр асуудалтай байгаа. Үүнээсээ болоод “Стандарт” банканд төлөх өрийн асуудлыг ч ярьж чадахгүй байна. Эрдэнэт үйлдвэр бизнес төлөвлөгөөгөө хэвийн явуулж чадахгүй байдалд хүрлээ. Мөнгө захиран зарцуулах эрх нь ч төвөгтэй байдалтай байгаа” хэмээж байсан.

Гэтэл онцгой дэглэмтэй байх өнгөрсөн хэдхэн сарын хугацаанд 410 тэрбум төгрөгийн буюу 154 сая ам.долларын үнийн дүн бүхий 197 гэрээг сонгон шалгаруулалтгүйгээр шууд байгуулсан талаарх мэдээлэл нийгэмд тархаад байна. Хэрэв энэ үнэн бол Эрдэнэт үйлдвэрийн үйл ажиллагааг Засгийн газрын шууд хяналтад авч хэвийн үйл ажиллагааг хангах ажлуудыг хийнэ гэсэн Таны Засгийн газрын шийдвэрийг мушгин гуйвуулж ажиллаж байна эсвэл эрх баригчид халаасаа зузаатгах ажлаа “Онцгой дэглэм” нэрээр халхавчлан хийж байна гэж ойлгогдох нөхцөл байдал үүссэн байна. Үүнд:


Иймд УИХ-ын гишүүн миний бие дээрх асуудалтай холбогдуулан УИХ-ын тухай хуулийн 7 дугаар зүйлийн 7.1.13, 33 дугаар зүйлийн 33.1.2 дахь заалтуудыг тус тус үндэслэн Монгол Улсын Ерөнхий сайд Танд дараах асуулгыг тавьж байна.


1. 1. Уулын баяжуулах Эрдэнэт үйлдвэрт онцгой дэглэм тогтоосон хугацаанд ажлын хэсэг хэрхэн ажилласан үр дүнгийн талаар;

2. 2. Улсын Их Хурлын 23 дугаар тогтоолын хэрэгжилт ямар шатанд байгаа талаар;

3. 3. Уулын баяжуулах Эрдэнэт үйлдвэрт тогтоосон онцгой дэглэмийн хугацааг сунгах талаарх мэдээлэл бодитой эсэх, хэрэв сунгах бол ямар шалтгааны улмаас хэдий хугацаагаар сунгах, энэ хугацаанд гүйцэтгэх ажлын төлөвлөгөөний талаар;

4. 4. Монгол Улс 1992 онд шинэ Үндсэн хуулиа батлан мөрдөж байгаа. Монгол Улсын Засгийн газарт эрх олгох тухай 1991 оны 1 дүгээр сарын 4-ний өдрийн хуулиар уулын баяжуулах Эрдэнэт үйлдвэрт Онцгой дэглэм тогтоосон нь Үндсэн хуульд хэрхэн нийцэж байгаа талаар;

5. 5. Онцгой дэглэм тогтоосон хугацаанд нийт хэдэн төгрөгийн худалдан авалтыг ямар байгууллагуудтай хийсэн, үүнээс хэдэн төгрөгийн худалдан авалтыг шууд гэрээ байгуулах замаар ямар аж ахуйн нэгж, байгууллагатай хийсэн талаар дэлгэрэнгүй мэдээллийг ирүүлнэ үү.


Асуулгын хариуг Монгол Улсын Их Хурлын тухай хуулийн 33 дугаар зүйлийн 33.3 дахь хэсэгт заасан хугацаанд бичгээр ирүүлж, Улсын Их Хурлын чуулганы нэгдсэн хуралдаанд сонсгохыг Танаас хүсье" гэжээ.




Холбоотой мэдээ