Улаанбаатар
ХХЕГ-ын дарга энэ оны есдүгээр сард ОХУ-д айлчилна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. ХХЕГ-ын удирдлага,
өөрийн сонсогчдыг ОХУ-аас нутагтаа ирэх үед халдвараас урьдчилан сэргийлэх зорилгоор
хамгаалалтын хувцас авах мөнгөний асуудлыг шийдвэрлэсэн байна.
Хил хамгаалах
байгууллагын захиалгаар ОХУ-ын БХЯ-ны цэргийн академи, сургуулиудад болон
ХАБА-ны Хилийн академи, дээд сургуульд суралцаж буй сонсогч нар бүгд эх орондоо
ирсэн байна. Тэднээс халдвар авсан нэг ч тохиолдол илрээгүй аж.
ХХЕГ-ын дарга 2020 оны есдүгээр
сард ОХУ-д албан ёсны айлчлал хийхээр төлөвлөөд байгаа гэж Монгол Улсаас ОХУ-д
суугаа Элчин сайдын яамны I нарийн бичгийн дарга, Хилийн албан ёсны төлөөлөгч,
хурандаа Ч.Дэлэг онцлов.
Мөн Монгол Улсын Хил
хамгаалах байгууллага, ОХУ-ын ХАБА-ны Хилийн алба хооронд 2017-2020 онд хамтран
ажиллах гэрээ дуусгавар болж байгаа бөгөөд 2021-2024 онд хамтран ажиллах гэрээг
байгуулах бэлтгэл ажлыг хангах, албан хаагчдыг сургах гэрээнд орох нэмэлт
өөрчлөлтийг эцэслэн баталгаажуулах ажлууд байгаа юм байна.
Ташрамд дуулгахад, Хил хамгаалах байгууллагын албан хаагчдыг ОХУ-ын цэргийн
академи, дээд сургуульд суралцуулах талаар хоёр байгууллагын хооронд хийсэн гэрээний
дагуу манай сонсогч нар ОХУ-д суралцдаг. Харин өнгөрсөн жилээс эхлэн уг гэрээнд
тодотгол оруулах талаар ажиллаж байгаа бөгөөд тодотгол оруулсан тохиолдолд
манай сонсогч нар ОХУ-ын курсантуудын нэг адил хангамж авах боломжтой болох аж.
ХХЕГ-ын дарга Ялалтын баярын үеэр ОХУ-д албан ёсны айлчлал хийх, айлчлалын үеэр
уг гэрээнд гарын үсэг зурах байсан ч коронавирусний халдвар гарснаас болж
хойшилжээ. Гэхдээ цахим хэлбэрээр хоёр тал хоорондоо гэрээг солилцож, гарын
үсэг зурахаар ажиллаж байгаа юм.
