Улаанбаатар
Австрийн виз мэдүүлэх төв ажиллаж эхэллээ
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Австрийн виз мэдүүлэх төв Улаанбаатар хотноо өнөөдрөөс ажиллаж эхэллээ.
Тодруулбал, ХБНГУ-ын Элчин сайдын яам энэ он гарснаас хойш Австрийн визийн мэдүүлгийг хүлээн авахаа зогсоогоод байсан юм. Тиймээс Австри улсад зорчих иргэд тус виз мэдүүлгийн төвд Шенгенийн C, үндэсний удаан хугацааны D ангиллын визийг мэдүүлэх боломж бүрдэж байгаа юм.
Улаанбаатар дахь Австрийн виз мэдүүлгийн төв нь дараах журмын дагуу үйл ажиллагаа явуулах юм:
- Бээжин хот дахь Австрийн ЭСЯ-ны албан ёсны цахим хуудас болон мэдүүлгийн төвөөс гаргаж буй мэдээ, мэдээллийг олон нийтэд хүргэх,
- Визийн мэдүүлэг, үнэ, биеийн давхцахгүй өгөгдөл /biometric data/ зэргийг ЭСЯ-наас өгсөн зааварчилгааны дагуу авах,
-Эрх бүхий этгээдэд паспортуудыг буцаан олгох,
-Визийн үйлчилгээний хөлс 75 евро,
-Визийн төлбөрийн хувьд ангиллаас хамааран харилцан адилгүй байна.
Австрийн виз мэдүүлэх төвийн цагийн хуваарь:
Ажлын өдөр өглөөний 09.00-15.00 цаг хүртэл /нийтийн амралтын өдөр ажиллахгүй/
Виз мэдүүлгийн төв нь Сүхбаатар дүүрэгт байрладаг DHL барилгын 2 давхарт байрлаж байна.
