Улаанбаатар
Томуугаар өвчлөгсдийн 39.8 хувийг нэг хүртэлх насныхан эзэлж байна
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Нийслэлийн хэмжээнд энэ сарын 14-ний байдлаар, амбулаторийн 53.611 үзлэг хийснээс томуу, томуу төст өвчтэй 973 тохиолдол оношлогджээ.
Энэ нь нийт үзлэгийн 1.8 хувийг эзэлж байгаа
нь өнгөрсөн 7 хоногийн дундаж түвшнээс 0.1 хувиар нэмэгдсэн, өнгөрсөн оны мөн
үеийн түвшнээс 7.8 хувиар буурсан үзүүлэлттэй байна.
Нийт өвчлөгсдийн 39.8 хувийг нэг хүртэлх нас, 19.5 хувийг 2-4
нас, 8.0 хувийг 5-9 нас, 5.0 хувийг 10-15 насны хүүхдүүд эзэлж байгаа юм.
Хүүхдийн түргэн тусламжийн 557 дуудлага ирснээс 33.8 хувь нь томуу, томуу төст
өвчний тусламж, үйлчилгээг авчээ.
Мөн энэ сарын 15-ны байдлаар, нийслэлийн харьяа эмнэлгүүдийн
хүүхдийн 1123 орон дээр 354 хүүхэд хэвтэн эмчлүүлж байна. Шинээр хэвтсэн
өвчтөний 47 буюу 17.8 хувь нь томуу, томуу төст өвчтэй өвчтөн байгаагаас 100 хувь нь хүүхдүүд байна. Хүнд
өвчтэй хүмүүсийн 12 буюу 15.8 хувийг амьсгалын замын өвчтэй өвчтөн эзэлж байгаа юм.
Томуу, томуу төст өвчин буюу амьсгалын замын цочмог халдвар, мөн
коронавируст халдвараас урьдчилан сэргийлэх үүднээс эцэг эхчүүд бага насны
хүүхдэдээ тавих анхаарал халамжаа сайжруулж, илчлэг сайтай хоол ундаар дархлааг
нь дэмжих, дулаан хувцаслах, олон нийтийн газраар дагуулж явахгүй байх, амны
хаалт тогтмол зүүлгэж хэвших, өвчилсөн тохиолдолд дур мэдэн эмчлэхгүй байх, ариун
цэврийн дэглэм сайтар сахиж, шаардлагатай тохиолдолд эмнэлгийн байгууллагад
хандахыг Нийслэлийн Эрүүл мэндийн газраас
зөвлөлөө.
