Улаанбаатар
Л.Оюун-Эрдэнэ: Шийдвэр гаргах түвшинд залуусын оролцоог хангаж, саналыг нь ажилдаа тусгана
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Монгол Улсын Ерөнхий сайд Л.Оюун-Эрдэнэ Залуусын хөгжлийн зөвлөлийн гишүүдтэй өнөөдөр уулзав.
Уулзалтад Залуусын хөгжлийн үндэсний зөвлөл болон яам, агентлаг, байгууллагууд, нийслэл, аймаг, дүүргийн салбар зөвлөлийн гишүүд танхим болон цахимаар оролцов. Залуус голчлон гарааны бизнесийг дэмжих, тогтвортой ажлын байр, боловсрол, эрүүл мэнд, гэр бүл, орон сууц, орон нутаг, хилийн боомтуудад ажиллахад нь дэмжлэг болох, хот хөдөөгийн тэнцвэрийг хангах, эдгээрт залуусын оролцоо ямар байж болох талаар байр сууриа илэрхийллээ.
Залуусын хөгжлийг дэмжих чиглэлээр Засгийн газар боломжит бүх арга хэмжээг авна гэдгээ Ерөнхий сайд Л.Оюун-Эрдэнэ тодотголоо. 2022 оны улсын төсвийг батлуулахдаа,
- Иргэд, ялангуяа залуучууд, залуу гэр бүлийг орон сууцжуулах
- Цахим шилжилт хийх
- Төвлөрлийг сааруулах
- Ногоон байгууламж бий болгох
- Экспортыг дэмжиж, ажлын байр бий болгох тусам тухайн аж ахуйн нэгж, байгууллагыг дэмжих бодлого барихаа тэмдэглэв.
Залуусын хөгжлийн үндэсний болон салбар зөвлөлүүд залуусын өмнө тулгарч байгаа асуудал, түүний гарц шийдлийг нь олж хардаг, мэдрэмжтэй, мэргэжлийн, сайн зөвлөгч байхыг хүслээ. Засгийн газар ч санал, зөвлөгөөг нь ажилдаа тусгаж, шийдвэр гаргах түвшинд залуусын оролцоог хангаж байхаа тодотгов.
2017 онд УИХ Залуусын хөгжлийг дэмжих тухай хууль батласан байна. Энэ хүрээнд 2018 онд Залуусын хөгжлийн төвүүд байгуулагдсан бол 2019 онд Үндэсний хөтөлбөртэй болжээ. Өнгөрсөн сард Үндэсний зөвлөл анхны хуралдаанаа хийн 2021 онд хийх ажлын төлөвлөгөөгөө батласан юм. Зөвлөл нь залуусын хөгжлийг дэмжих, эрхийг нь хангах, шийдвэр гаргах түвшинд залуучуудын оролцоог нэмэгдүүлэх, тэдний үзэл бодлыг сонсох, санал, санаачилгыг нь дэмжих замаар үнэлэмж, өрсөлдөх чадварыг нь дээшлүүлэх зорилготой.
Өнөөдрийн байдлаар, улсын хэмжээнд 300 гаруй салбар зөвлөл 6,000 гаруй гишүүнтэй ажиллаж байна. Залуусын хөгжлийн үндэсний зөвлөлийг Монгол Улсын Ерөнхий сайд Л.Оюун-Эрдэнэ ахалдаг.
