Ойрын хавьтал болоогүй тохиолдолд иргэд шинжилгээг төлбөртэй өгнө

Орон нутагт | Сүхбаатар
odonchimeg@montsame.mn
2021-09-22 15:50:50

Сүхбаатар /МОНЦАМЭ/. Өнөөдрөөс тус аймагт халдварын шинжилгээ авах түр цэг болон эмчилгээний зөвлөгөө өгөх үйлчилгээний цэг ажиллаж эхэлсэн. Батлагдсан тохиолдлын ойрын хавьтлаас бусад тохиолдлын бүх иргэн шинжилгээг төлбөртэй буюу 15 мянган төгрөгөөр өгнө. Өөрөөр хэлбэл жирэмсэн эмэгтэй, өндөр настан, хүүхдүүд гээд эрсдэлт бүлгийн иргэд ч мөн шинжилгээнд төлбөртэй хамрагдах аж.

Одоогоор энэхүү цэгийн ачаалал их байна. Түр цэгт шинжилгээ өгөөд хариу эерэг гарсан тохиолдолд тухайн иргэн шууд эмчилгээний цэг рүү очих ёстой. Эрэмбэлэлтийн эмч тухайн иргэнийг үзэж, биеийн байдлыг эрэмбэлээд АНЭ болон ӨЭМТ-ийн эмчид хүлээлгэн өгөх юм. Харин түр цэг рүү ирж үзүүлэх боломжгүй иргэдийг гэрээр нь шинжилгээнд хамруулж, зохих үйлчилгээг үзүүлж байна гэж Шуурхай штабын Тандалтын багийн ахлагч Х.Батцэцэг хэллээ.

Энэ зарчимд шилжснээр өрхийн эмнэлгүүдийн ачаалал тодорхой хэмжээгээр багасчээ. Өөрөөр хэлбэл одоо зөвхөн халдвараас бусад төрлийн оношоор эмчилгээ, үйлчилгээ авах иргэд өрхийн эмнэлэгт хандаж байна. 

Холбоотой мэдээ