Эквадорт газрын тосны олборлолт зогсож магадгүй байна

ДЭЛХИЙД | ЭДИЙН ЗАСАГ
Jargal.d@montsame.mn
2022-06-27 11:38:44

РИО-ДЕ-ЖАНЕЙРО. /TASS/. Хоёр долоо хоногийн өмнөөс Эквадорыг бүхэлд нь хамарсан эсэргүүцлийн жагсаал үргэлжилбэл тус улсын газрын тосны олборлолт хоёр өдрийн дараа зогсож магадгүй байна. Ийм мэдэгдлийг тус улсын Эрчим хүч, уул уурхайн яам цахим хуудсандаа ням гарагт нийтэлжээ. 


“Эквадорын газрын тосны олборлолт маш бага түвшинд байна. Олборлолт 50 хувиар буурсныг (зургаадугаар сарын 12-ныг хүртэл дунджаар 520 мянган торх олборложээ) өнөөдрийн тоо баримтууд харуулж байна. Эвдэн сүйтгэх, газрын тосны цооногийг булаан авах, зам хаах зэрэг үйлдлүүд нь олборлолтыг үргэлжлүүлэхэд шаардлагатай дизель түлш, түүхий эдийг хүргэх боломжгүй болгож байгаа тул байдал энэ хэвээр үргэлжилбэл газрын тосны олборлолтыг 48 цагийн дараа түр зогсооно" гэж тус яамны “Twitter” хуудсанд нийтлэгдсэн мэдэгдэлд дурдсан байна.


Сүүлийн хоёр долоо хоногт Эквадорын газрын тосны олборлолт 1.3 сая торхоор буурсан бөгөөд төрийн өмчит “Petroecuador” компани хамгийн их буюу 1 061 875 торх, хувийн компаниуд 272 223 торх газрын тосны алдагдал хүлээжээ. 1176 цооногт олборлолтыг зогсоосны 996 нь “Petroecuador” компанийнх, 180 нь хувийн компаниудынх байна. 


Эрх баригчдынхаа нийгэм, эдийн засгийн бодлогыг эсэргүүцсэн жагсаал Эквадорт зургаадугаар сарын 13-нд жижиг жагсаал цуглаанаар эхэлж, долоо хоногийн дараа тус улсыг бүхэлд нь хамарчээ. Жагсаалыг “CONAIE” байгууллагаас зохион байгуулсан байна. Жагсаалд оролцогчид шатахууны үнийг бууруулах, гэмт хэргийн гаралт нэмэгдэж байгаатай холбогдуулан иргэдийн аюулгүй байдлыг хангахыг шаардаж байгаа аж. Эквадорын Ерөнхийлөгч Гильермо Лассо өнгөрөгч баасан гарагт ард иргэддээ хандаж үг хэлэхдээ, тус улсын хотуудад болсон хүчирхийллийн ажиллагаанд оролцогчдын жинхэнэ зорилго нь төрийн эргэлт зохион байгуулах явдал юм гэж мэдэгджээ. Тэрбээр улс орны ардчилалд заналхийлж буйг анхааруулаад, шаардлагатай бол хийн зэвсгийн оронд галт зэвсэг хэрэглэхийг цагдаа, армидаа зөвшөөрчээ. Үүнтэй холбоотойгоор Эквадорын парламент Лассод итгэл үзүүлэх эсэх асуудлыг хэлэлцэж эхэлсэн байна. 


Хоёр долоо хоног үргэлжилсэн жагсаалын үеэр таван хүний амь нас хохирчээ. 


Холбоотой мэдээ