ОРХОН: Баяр наадмын үеэр 48 иргэнээс ковидын халдвар илэрчээ

ОРОН НУТГИЙН МЭДЭЭ | ОРХОН
orkhon@montsame.mn
2022-07-18 15:00:24
oyuka_hu@yahoo.com

Орхон/МОНЦАМЭ/.Баяр наадмын өдрүүдэд БОЭТ-ийн  Яаралтай тусламжийн тасгаар  1092 иргэн үйлчлүүлжээ. Мөн түргэн тусламжийн 433 дуудлага ирснээс хүүхэд 66, том хүн 367 байна.  Хүүхдийн хүлээн авах тасгаар 1314 хүүхэд үйлчлүүлснээс 43 нь хэвтэн эмчлүүлж, 1268 нь зөвлөгөө авчээ. Халдвартын тасгийн хүлээн авахаар 90 иргэн үйлчлүүлснээс 48 иргэнээс ковидын халдвар илэрсэн гэж  БОЭТ-ийн Эмчилгээ эрхэлсэн орлогч дарга М.Алтанбек аймгийн Засаг даргын шуурхай зөвлөгөөний үеэр мэдээллээ.

Тус хурлын үеэр Онцгой байдлын газрын  дарга, хурандаа Г.Ганбаатар хэлэхдээ,”ОБЕГ-ын даргын А/178 тоот тушаалаар өндөржүүлсэн бэлэн байдлын зэрэгт энэ сарын 10-наас 18-ны өглөөний 09:00 цаг хүртэлх хугацаанд шилжиж ажиллалаа. Баяр наадмын өдрүүдэд давхардсан тоогоор 12 автомашин, 275 албан хаагч 184 объектод шалгалт хийж, 106 зөрчлийг газар дээр нь арилгуулан ажилласан. Мөн 120 орчим иргэнд галын аюулаас урьдчилан сэргийлэх чиглэлээр холбогдох мэргэжлийн байгууллагуудтай хамтран сургалт зохион байгууллаа. Баяр наадмын өдрүүдэд болон амралтын өдрүүдэд аймгийн хэмжээнд хоёр удаагийн 32,9 мм  хур бороо орсноос ямар нэгэн дуудлага ирээгүй. Үер уснаас урьдчилан сэргийлэх мэдээллийг 7200 гаруй иргэнд өгч ажиллалаа” гэлээ.

Цагдаагийн газрын хошууч н.Бадамжунай:-Үндэсний их баяр наадмын өдрүүдэд цагдаагийн байгууллагын бие бүрэлдэхүүн ард иргэдийнхээ амар тайван байдлыг хангаж өндөржүүлсэн бэлэн байдалд ажиллалаа. Цагдаагийн алба хаагчид иргэдийн аюулгүй байдлыг хангах, гэмт хэрэг, зөрчлөөс урьдчилан сэргийлэх зорилгоор хэв журмын хамгаалалт, эргүүлийн үйл ажиллагааг амжилттай зохион байгуулав. Цагдаагийн байгууллагын 250 албан хаагч, 30 тээврийн хэрэгсэлтэйгээр энэ сарын 9-нөөс 13-ны өдрүүдэд хэв журам сахиулж өндөржүүлсэн бэлэн байдалд ажиллалаа. Баяр наадмын болон амралтын өдрүүдэд цагдаагийн байгууллагад 376 дуудлага мэдээлэл ирснийг шуурхай шалган шийдвэрлэсэн.  Баяр наадмын өдрүүдэд бага насны хүүхдүүд эцэг эхээсээ төөрөхөөс урьдчилан сэргийлж эцэг эх, асран хамгаалагчийнх нь утасны дугаарыг  бичсэн бугуйвчийг зүүж өгсөн. Мөн  халаасны хулгайн гэмт хэргээс урьдчилан сэргийлэх зорилгоор тараах материалыг үйлчилгээний байгууллагууд болон иргэдэд тарааж ажиллалаа.

Холбоотой мэдээ