Улаанбаатар
ДОРНОГОВЬ: Нүүдлийн эмнэлгийн баг сумдад ажиллаж байна
ОРОН НУТГИЙН МЭДЭЭ | ДОРНОГОВЬ
Сайншанд, 2024 оны тавдугаар сарын 17 /МОНЦАМЭ/. Монгол Улсын Засгийн газраас “Хүн амын нас, хүйс, эрүүл мэндийн
эрсдэлд суурилсан зонхилон тохиолдох халдварт болон халдварт бус өвчлөлөөс
урьдчилан сэргийлэх, эрт илрүүлэх үзлэг, шинжилгээ, оношилгоо”-г үндэсний
хэмжээнд зохион байгуулж буй
Энэ ажлын хүрээнд улсын Нэгдүгээр төв эмнэлгээр ахлуулсан нүүдлийн эмнэлгийн баг урьдчилан сэргийлэх, эрт илрүүлэг үзлэгийн тусламж үйлчилгээг 5 дугаар сарын 12-ноос Дорноговь аймгийн сумдад эхлүүлээд байна. Эмч нар Мандах сумаас үзлэгээ эхэлсэн бөгөөд Хөвсгөл суманд гурав хоног ажиллаад, Хатанбулаг, Улаанбадрах сумын 18-аас дээш насны иргэдийг үзлэгт хамруулна.
Үзлэгийн багт, "Клинико" эмнэлгийн эмч, ажилтан, Улсын нэгдүгээр төв эмнэлгийн дурангийн эмч, сувилагч, зүрх судасны эмч, Эх, хүүхдийн эрүүл мэндийн үндэсний төвийн эмэгтэйчүүдийн эмч, Халдварт өвчин судлалын үндэсний төвийн дүрс оношилгооны эмч, мэргэжилтнүүд багтжээ.
Одоогоор давхардсан тоогоор 2000 гаруй хүнд үзлэг хийж зөвлөгөө өгсөн бөгөөд
үйлчлүүлэгчдийн биеийн байдал, хүнд хөнгөн эсэхийг үзэж, орон нутагт эмчлүүлэх боломжтой эсэхийг
тодорхойлох, дараагийн шатны эмнэлэгт
хандах зэрэгт зөвлөгөө өгч, тухайн сумын эмч нартай хамтран ажиллаж байгаа юм. Нүүдлийн эмнэлгийн баг энэ сарын 26-ныг хүртэл ажиллана.
