Улаанбаатар
ӨВӨРХАНГАЙ: “Соёлын бүтээлч сар”-аар Өндөр гэгээний өв соёлоос суралцана
ОРОН НУТГИЙН МЭДЭЭ | ӨВӨРХАНГАЙ
Арвайхээр, 2024 оны арваннэгдүгээр сарын 5 /МОНЦАМЭ/. Өвөрхангай аймагт “Соёлын бүтээлч сар”-ын үйл ажиллагааг “Өндөр гэгээний өв соёлоос суралцахуй” сэдвийн хүрээнд зохион байгуулж байна.
Анхдугаар
Богд, өндөр гэгээн Занабазар нь шашин судлалын нэрт зүтгэлтэн төдийгүй хэл
шинжлэлийн эрдэмтэн, уран барималч, зураач, гүн ухаанч, архитекторч хүн байсан
ба түүний бүтээсэн биет болон биет бус соёлыг хойч үедээ өвлүүлэн үлдээх,
дэлхий дахинд сурталчлан таниулах ажлыг аймгийн Соёл урлагийн газраас тасралтгүй
хийсээр байгаа юм.
“Соёлын бүтээлч сар”-ын нээлтийн үеэр “Монголын анхдугаар Богд, Өндөр гэгээн Занабазарын өв соёл” олон улсын эрдэм шинжилгээний хурлын тоймыг танилцуулж, хүндэт зочдод номын дээжээс гардууллаа.
Мөн Өндөр гэгээний бүтээсэн Жанлавцогзол номын утга агуулга, унших бясалгахын ач тус, учир холбогдлыг Ганданпунцоглин хийдийн хамба лам, Хэл бичгийн ухааны доктор Я.Ганзаяа тайлбарлан таниулж, жүжигчин МУСТА А.Номинчимэг монгол орчуулгаар нь уншиж толилуулав.
Түүнчлэн “Өндөр гэгээний соёлын өв дэх хосмолжин шинж”, “Үрс гаргах их ёслол ба Өндөр Гэгээн” зэрэг илтгэлийг тавилаа.
Аймгийн хэмжээнд түүх, соёлын үл хөдлөх 84 өв байдгаас Өндөр гэгээнтэй холбоотой 21 үл хөдлөх өвийн домог, хууч яриа байдаг аж. Түүний мэлмий гийсэн газар болох Есөнзүйл сумын нутаг “Мандаа толгой”-той холбоотой олон домог яриа байх ба эрдэмтэн, судлаачдын анхааралд зүй ёсоор багтдаг.
Тэрчлэн Өндөр гэгээн 1686 онд төвөд, энэтхэгийн ланз үсгэнд тулгуурлан Соёмбо үсгийн цагаан толгойг зохиосон нь Монгол үндэстний тусгаар тогтнол, эрх чөлөөний бэлгэдэл болж, төрийн далбаанд уламжлагдан оршсоор байна. Ирэх жил Өндөр гэгээн Занабазарын мэндэлсний 390 жилийн ой тохиох юм.
“Соёлын бүтээлч сар”-ын хугацаанд аймгийн соёл, урлагийн салбараас урлагийн 25 тоглолт, 20 үзэсгэлэн, боловсролын 31 хөтөлбөр, 37 сургалт, хэлэлцүүлэг, нөлөөллийн 25 ажил, 22 контент бүтээж олон нийтэд түгээхээр төлөвлөөд байна.
