Улаанбаатар
Сонгуулийн өгөгдлийн дүрслэлийн үзэсгэлэнг дэлгэв
МОНГОЛЫН МЭДЭЭ | УЛС ТӨР
Улаанбаатар, 2024 оны арваннэгдүгээр сарын 13 /МОНЦАМЭ/. Сонгуулийн ерөнхий хороо, “Тунгаахуй” өгөгдлийн урлан хамтран өнөөдөр Сонгуулийн өгөгдлийн дүрслэлийн үзэсгэлэнг дэлгэлээ.
УИХ-ын 2024 оны ээлжит сонгууль, Аймаг, нийслэл, сум, дүүргийн ИТХ-ын 2024 оны ээлжит сонгуулийн зохион байгуулалт, үр дүнгийн талаарх нээлттэй мэдээлэлд суурилсан 100 орчим өгөгдлийн дүрслэлийн дээжээс энэхүү үзэсгэлэнд дэлгэв. Үзэсгэлэнгийн бүтээлүүдийг сонгуулийн өгөгдлийн дүрслэлийн нээлттэй сан болгон хөгжүүлж, Сонгуулийн ерөнхий хорооны m-election.mn болон tungaahui.mn сайтаар мэдээлсэн бөгөөд бүтээлүүдийг чөлөөтэй ашиглах боломжтой.
Сонгуулийн өгөгдлийн дүрслэлийн үзэсгэлэнг НҮБ-ын Хөгжлийн хөтөлбөр “Шийдвэр гаргах түвшинд жендерийн тэгш байдал, эмэгтэйчүүдийн оролцоог дэмжих нь төсөл”-ийн дэмжлэгтэйгээр танилцуулж байгаа юм. МУИС-ийн оюутнууд болон хэвлэл мэдээллийн байгууллага, иргэний нийгмийн байгууллагын төлөөлөл үзэсгэлэнтэй танилцаж, мэдээлэл авав.
