Улаанбаатар
ХОВД: Дөрөвдүгээр сарын цаг агаарын урьдчилсан төлөв
ОРОН НУТГИЙН МЭДЭЭ | ХОВД
Жаргалант, 2025 оны гуравдугаар сарын 31 /МОНЦАМЭ/. Ховд аймгийн Ус, цаг уур, орчны шинжилгээний төвөөс дөрөвдүгээр сарын цаг агаарын урьдчилсан төлөв мэдээллийг танилцууллаа.
Дөрөвдүгээр сарын агаарын температурын олон жилийн дундаж нь ихэнх нутгаар +6 градус дулаанаас -4 градус хүйтэн байдаг.
Сарын нийлбэр хур тунадас олон жилийн дунджаар их нууруудын хотгороор 0-2 мм, бусад нутгаар 2-6 мм ордог.
Олон жилийн дундаж (ОЖД) гэдэг нь 1991–2020 оны хоорондох тухайн цаг уурын хэмжигдэхүүний дундаж утга юм.
Тэгвэл цаг агаарын урьдчилсан мэдээгээр ирэх сард агаарын дундаж температур их нууруудын хотгороор олон жилийн дунджаас хүйтэн, бусад нутгаар олон жилийн дунджийн орчим байна. Харин хур тунадас ихэнх нутгаар олон жилийн дунджийн орчим байх төлөвтэй.
Өөрөөр хэлбэл, дөрөвдүгээр сарын нэг болон хоёрдугаар арав хоногийн дунд үед ихэнх нутгаар олон жилийн дунджаас 1-3 градусаар хүйтэн байх бол нэгдүгээр арав хоногийн сүүлээр, хоёрдугаар арав хоногийн эхэн, гуравдугаар арав хоногийн эхэн болон сүүлээр ихэнх нутгаар олон жилийн дунджаас 1-3 градусаар дулаан байх төлөвтэй.
Ирэх сарын эхний хагаст хур тунадас харьцангуй бага байх боловч салхи их байх магадлал өндөр. Харин хоёрдугаар арав хоногийн сүүлч болон гуравдугаар арав хоногийн дунд, сүүлээр ихэнх нутгаар хур тунадас орох магадлалтай байна.
Ирэх сарын эхний долоо хоногийн сүүлээр агаарын температур олон жилийн дунджаас хүйтэн бусад хугацаанд ерөнхийдөө хоног хоорондын өөрчлөлт бага, салхины хурд харьцангуй их байх магадлалтай байгаа бөгөөд хоёрдугаар арав хоногийн эхэн үеэр ихэнх нутгаар харьцангуй дулаарах боловч хоёрдугаар арав хоногийн дунд үеэс ихэнх нутгаар агаарын муудалт ажиглагдах төлөвтэй. Цаашид гуравдугаар арав хоногийн ихэнх хугацаанд агаарын тогтворгүй өдрүүд үргэлжлэх төлөвтэй гэж Ховд аймгийн Ус, цаг уур, орчны шинжилгээний төвөөс мэдээллээ.
