Улаанбаатар
Нийслэлийн өдөр, Даншиг наадмыг хамт тэмдэглэхээр болжээ
МОНГОЛЫН МЭДЭЭ | НИЙГЭМ
Улаанбаатар, 2025 оны зургаадугаар сарын 17 /МОНЦАМЭ/. Монголчууд жилд албан ёсны болон өргөн дэлгэр тэмдэглэдэг 15-20 өдөр бий.
Тухайлбал, жил бүр аравдугаар сарын 29-нд нийслэлийн өдрийг тэмдэглэж ирсэн. Мөн жил бүрийн наймдугаар сарын эхний долоо хоногийн амралтын өдрүүдэд Даншиг наадам зохион байгуулдаг байв. Тэгвэл энэ жилээс нийслэлийн өдөр, даншиг наадмыг хамтад нь зургаадугаар сарын 28, 29-нд Хүй долоон худагт зохион байгуулахаар болов. Тодруулбал, цаашид наймдугаар сард даншиг наадам, аравдугаар сард нийслэлийн өдрийг тэмдэглэхгүй гэсэн үг. Нийслэлийн өдрийг иргэдийн баяр болгон жил бүрийн зургаадугаар сарын сүүлийн долоо хоногийн амралтын өдөр тэмдэглэх Засгийн газрын тогтоол ч гарчээ. Нийслэлийн иргэдийн баяр, даншиг наадмыг нэгтгэснээр цар хүрээ нь өргөжин тэлж, жуулчдыг татахад чухал ач холбогдолтой гэж үзэж байгаа аж.
Энэ үеэр хүчит
бөхийн барилдаан, хурдан морь болон жороо морины уралдаан, шагай, сур харвааны
наадам, сээр цохих тэмцээн, жижиг, дунд бизнес эрхлэгчдийн үзэсгэлэн,
Улаанбаатар хотын түүхэн гэрэл зургийн үзэсгэлэн, монгол хувцасны үзүүлбэр,
есөн дүүргийн ардын авьяастнуудын тоглолтоос гадна “Улаанбаатар” театрынхан уран
бүтээлээ толилуулна.
Түүнчлэн цам харайх, лам нарын дунд ном хаялцах, мэтгэлцэх, балин тосон урлалын тэмцээн, сор залах, соёмбот туг залах, шашны сүлд дуулал эгшиглүүлэх зэрэг шашин, соёлын арга хэмжээг үзэж сонирхох боломжтой. Тухайлбал, энэ жил цам харайх үзүүлбэрт 120 гаруй цамчин оролцох аж. Нийслэлийн иргэдийн баяр нь энэ сарын 27-нд Улаанбаатар хотын тахилга шүтлэгт дөрвөн уул болох Богдхан, Сонгинохайрхан, Чингэлтэй, Баянзүрх хайрханыг тахих ёслолоор эхлэх юм.
Энэ үеэр нийслэлийн хэмжээнд
үйл ажиллагаа явуулдаг сүм хийдүүд цан хэнгэргээ дуугарган, ард иргэдийн сайн
сайхны төлөөх хурал ном хурж, буян үйлдэн, сайн үйлсийн ажил зохион байгуулна.
