Зээлийн хэлэлцээрийн төслөөр МАН-ын бүлэг завсарлага авав
МОНГОЛЫН МЭДЭЭ | УЛС ТӨРУИХ-ын Эдийн засгийн байнгын хорооны өнөөдрийн хуралдаанаар Монгол Улсын Засгийн газар БНХАУ-ын Экспорт Импорт банк хооронд байгуулах 1 тэрбум ам.долларын зээлийн ерөнхий хэлэлцээрийн төслийг хэлэлцэх байсан ч МАН-ын бүлгээс завсарлага авлаа.
БНХАУ-ын дарга Си Зиньпин өнгөрсөн онд Монгол Улсад төрийн айлчлал хийхдээ эдийн засгийн хамтын ажиллагааг өргөжүүлэх зорилгоор 1 тэрбум ам.долларын хөнгөлөлттэй зээл олгох боломжтой хэмээн мэдэгдсэн. Энэ хүрээнд хоёр улс зээлийн ерөнхий хэлэлцээр байгуулахаар тохиролцсон юм. Уг зээлийг жилийн 2 хувийн хүүтэй авах бөгөөд 20 жил төлөх юм. Үүнээс эхний 7 жилд зээлийн үндсэн төлбөрөөс чөлөөлөгдөхөөр ерөнхий хэлэлцээрийн төсөлд тусгасан байна. Ерөнхийлөгч Ц.Элбэгдорж энэ сарын 09-нд БНХАУ-д төрийн айлчлал хийх үед зээлийн ерөнхий хэлэлцээрт гарын үсэг зурахаар төлөвлөжээ.
Хэлэлцэж буй асуудалтай холбогдуулан УИХ-ын гишүүн Ц.Нямдорж, Хэлэлцээрийн төслийг УИХ-ын гишүүдэд бүрэн тараагаагүй тул өчигдөр болсон МАН-ын бүлгийн хуралдаанаар энэ асуудлыг хэлэлцэж амжаагүй. Тиймээс хэлэлцээрийн төсөлтэй нарийн танилцах шаардлагатай байгаа тул завсарлага авч байна” гэлээ.
Мөн тэрбээр, Ерөнхийлөгчийн айлчлалын үеэр гарын үсэг зурах юм бол МАН-ын бүлэг маргааш хуралдаад санал, дүгнэлтээ гаргах боломжтой. Тиймээс маргааш бүлгийн хуралдааны дараа Эдийн засгийн байнгын хороог дахин хуралдуулж уг асуудлыг хэлэлцэх саналтай байна” гэснийг байнгын хорооны дарга хүлээж авав.
Ч.Ариунболд