Японы “Ниппон сан”-гийн хүндэт тэргүүн Сасакава Ёохэйг хүлээн авч уулзав
МОНГОЛЫН МЭДЭЭ | УЛС ТӨР
Улаанбаатар, 2026 оны дөрөвдүгээр сарын 13 /МОНЦАМЭ/. Гадаад харилцааны сайд Б.Батцэцэг Японы “Ниппон сан”-гийн хүндэт тэргүүн Сасакава Ёохэйг өнөөдөр хүлээн авч уулзав.
Сайд Б.Батцэцэг тус сангаас Монгол Улсын нийгэм, эдийн засгийн хөгжилд бодит хувь нэмэр оруулж, үр дүнтэй төсөл хөтөлбөр хэрэгжүүлж ирсэнд талархал илэрхийлээд, Ё.Сасакавад Монгол Улсын төрийн дээд шагнал “Хөдөлмөрийн гавьяаны улаан тугийн одон”-гоор шагнуулсанд баяр хүргэв. Мөн тус сангаас “Монгол Улсын парламентын залуу гишүүдийг Япон Улстай танилцуулах хөтөлбөр” хэрэгжүүлж буй нь хоёр улсын хууль тогтоох байгууллагын хамтын ажиллагаа, найрсаг харилцааг бэхжүүлэхэд чухал ач холбогдолтойг онцлов.
Ё.Сасакава цаашид ч Монгол, Японы найрамдалт харилцааг гүнзгийрүүлэх, төрийн албан хаагчдыг чадавхжуулах чиглэлээр идэвхийлэн ажиллахаа илэрхийлэв. Уулзалтаар бүс нутгийн итгэлцэл, энх тайван, тогтвортой байдлыг бэхжүүлэхэд төрийн бус байгууллага, олон нийтийн оролцоо чухлыг тэмдэглэж, эл чиглэлд “Улаанбаатарын яриа хэлэлцээ” олон улсын бага хуралд “Сасакава энх тайвны сан”-гаас төлөөлөгч оролцуулах зэргээр ойр хамтран ажиллахаар ярилцав.
Японы “Ниппон сан” нь 1962 онд байгуулагдсан ашгийн бус байгууллага бөгөөд хүмүүнлэг, нийгмийн халамж, эрүүл мэнд, боловсрол зэрэг салбарт үйл ажиллагаа явуулдаг гэж ГХЯ-наас мэдээллээ.
