Ulaanbaatar
Дүүжин замын тээвэр төсөл 38 хувийн гүйцэтгэлтэй үргэлжилж байна
МОНГОЛЫН МЭДЭЭ | НИЙГЭМ
Улаанбаатар, 2025 оны аравдугаар сарын 10 /МОНЦАМЭ/. “Дүүжин замын тээвэр” төслийг хэрэгжүүлж байна. Дүүжин замын тээвэр нь 98 кабинтай, оргил цагийн үед 2320 зорчигч тээвэрлэх хүчин чадалтай байх юм. Өнөөдрийн байдлаар төслийн гүйцэтгэл 38 хувьтай байна.
НЗДТГ-ын мэдээлснээр, төслийн хүрээнд 19 тулгуур багана, хоёр буудлын барилга барих юм. Хоёр
талын буудлын барилга угсралтын ажил үргэлжилж байна. Мөн тулгуур багануудын
шон суурийн ажил бүрэн дуусаж, суурийн ажлын явц 75 хувьтай байна. Одоогоор 19 тулгуур баганаас зургаан баганыг бүрэн угсарсан. Төслийн барилга
угсралтын ажил 18 хувийн гүйцэтгэлтэй байгаа бөгөөд 88 хүний
бүрэлдэхүүнтэй 15 машин, механизм төслийн талбайд ажиллаж байна. Дүүжин замын тээвэр барих ажилд 100 гаруй жилийн туршлагатай, дэлхийн тэргүүлэгч
Францын “Пома" групп ерөнхий гүйцэтгэгчээр ажиллаж, техникийн удирдлага,
гүйцэтгэлд хяналт тавьж, мэргэжлийн зөвлөмжөөр ханган ажиллаж байгаа аж.
“Моннис Инженеринг” компани барилга угсралтын ажлыг гүйцэтгэж байна. Дүүжин замын тээврийн материал, тоног төхөөрөмжийг Франц улсаас үе
шаттайгаар тээвэрлэн оруулж ирж байна. Одоогийн байдлаар 103 чингэлэг ачаа буюу
нийт ачаа тээврийн 69 хувь нь буугаад байгаа юм.
Улаанбаатар хотыг хөгжүүлэх 24 мега төслийн хүрээнд нийтийн тээврийн үйлчилгээний төрөл, хүртээмжийг нэмэгдүүлэх, авто замын түгжрэл, агаарын бохирдлыг бууруулах зорилготой юм.
