Улаанбаатар
Төрийн шилдэг цахим үйлчилгээгээр “Smartcar” систем шалгарав
МОНГОЛЫН МЭДЭЭ | НИЙГЭМУлаанбаатар /МОНЦАМЭ/.“Мэдээлэлжсэн нийгмийн дэлхийн өдөр”-ийг тэмдэглэн өнгөрүүлэх ажлын хүрээнд Засгийн газрын тохируулагч агентлаг Харилцаа холбоо, мэдээллийн технологийн газраас “Мишээл экспо” төвд зохион байгуулсан “Дижитал хөгжилд хамтдаа” уриан дор “ICT EXPO-2018” үзэсгэлэн мэдээлэл, харилцаа холбооны салбарын шилдэгүүдээ шалгарууллаа.
Үзэсгэлэнд төрийн болон хувийн хэвшлийн байгууллагууд оролцож, харилцаа холбоо, мэдээлэл технологийн салбарт энэ онд гарсан шилдэг шийдэл, шинэ дэвшилтэт техник технологи, бүтээгдэхүүн үйлчилгээгээ олон нийтэд танилцуулсан юм. Оролцогчдоос нийслэлийн Мэдээллийн технологийн газраас хийж хэрэгжүүлсэн Smartcar тээврийн хэрэгслийн нэгдсэн цахим үйлчилгээний систем “Шилдэг үйлчилгээ”-гээр шалгарч батламж авлаа. “Smartcar.mn” систем нь өөрийн эзэмшиж буй тээврийн хэрэгслийн мэдээллийг хянах, авто тээврийн хэрэгслийн албан татвар, агаарын бохирдлын төлбөр, зам ашигласны төлбөрийг орон зайнаас үл хамааран онлайнаар төлөх боломжтой анхны цахим систем юм. Тус газрын зүгээс төрийн үйлчилгээний шат дамжлагыг багасгаж, төрийн үйлчилгээг цахимжуулах, чанар, хүртээмжийг сайжруулах зорилгоор олон ажил хийж байгаагийн нэг нь энэхүү smartcar систем бөгөөд нэмэлт хөгжүүлэлтийг хийж дараах 9 төрлийн үйлчилгээг хэрэглээнд нэвтрүүлэхээр ажиллаж байна. Үүнд:
Автотээврийн хэрэгслийг улсын бүртгэлээс хасуулах хүсэлт гаргах үйлчилгээ;
Тээврийн хэрэгслийн эзэмшигчтэй утсаар холбогдох үйлчилгээ;
Ачиж журамласан тээврийн хэрэгслийн мэдээлэл хүргэх үйлчилгээ;
Авто засварын үйлчилгээний байгууллагуудын мэдээллийн үйлчилгээ;
Е.C зөвшөөрөл олгох үйлчилгээ;
Жолоодох эрхийн оноо шалгах үйлчилгээ;
Жуулчны тээврийн хэрэгсэлд зөвшөөрөл олгох үйлчилгээ;
Иргэд замын хөдөлгөөний зөрчлийг фото зураг, байршлын хамт SMARTCAR application-р мэдээллэх;
Төлбөртэй зогсоолын мэдээлэл хүргэх зэрэг үйлчилгээ орж байна.
Тодруулга: “Дижитал хөгжилд хамтдаа” уриан дор өнгөрсөн есдүгээр сарын 30-аас аравдугаар сарын 1-2-нд болсон “ICT EXPO-2018” үзэсгэлэнг Монгол Улсын цахилгаан холбооны байгууллагын 153 жилийн ой, Монгол Улсад орчин цагийн мэдээлэл, харилцаа холбооны салбар үүсч хөгжсөний 97 жилийн ойд зориулсан зохион байгуулсан юм.
