Өмнөд Хятадын тэнгис дэх маргаантай асуудлаар хэлэлцээ хийхийг санал болгов

ДЭЛХИЙН МЭДЭЭ | УЛС ТӨР
Jargal.d@montsame.mn
2018-11-19 14:40:17
БЭЭЖИН./RIA Novosti/. Хятад болон Филиппин улс нөхөрсөг зөвлөгөөн хийх замаар санал зөрөлдөөнөө үр ашигтайгаар зохицуулж, далай тэнгисийн асуудлаарх яриа хэлцээ, хамтын ажиллагаагаа бэхжүүлэн Өмнөд Хятадын тэнгисийг найрамдал, хамтын ажиллагааны тэнгис болгон хувиргах ёстой. Ийм мэдэгдлийг БНХАУ-ын дарга Си Жиньпин хийснийг “Philippine Star” сонинд түүний Филиппин улсад хийх төрийн айлчлалын өмнө нийтэлжээ.

Родриго Дутертег ерөнхийлөгчөөр сонгогдсоны дараа хоёр орон Өмнөд Хятадын тэнгис дэх маргаантай асуудлыг зохицуулах яриа хэлцээ, зөвлөгөөнөө сэргээсэн болохыг тэрбээр цохон тэмдэглэжээ. Си Жиньпин мөн хоёр жил гаруйн хугацаанд Хятад улс Филиппиний худалдааны томоохон түнш, экспортын томоохон зах зээл, мөн импортын томоохон эх үүсвэр болсныг нэмж хэлсэн байна.

“Удахгүй хийх айлчлалынхаа үеэр Ерөнхийлөгч Дутертетэй иж бүрэн хамтын ажиллагааг шинэ нөхцөлд бэхжүүлж, хоёр талын хамтын ажиллагааны түвшнийг цаашид нэмэгдүүлэх талаар санал бодлоо дэлгэрэнгүй солилцох хүсэлтэй байна” гэж Хятадын удирдагч мэдэгджээ.
Тэрбээр Филиппиний Засгийн газрын явуулж буй мансууруулах бодис болон терроризмтой тэмцэх ажиллагааг шийдэмгий дэмжинэ гэдгээ илэрхийлсэн байна.

“Бид Хятад-Филиппиний харилцааг хөгжүүлэхийн тулд улс төрийн харилцан итгэлцлээ дээшлүүлэх зайлшгүй шаардлагатай. Хятад улс хоёр орны харилцааны хэтийн төлөвийн төлөвлөгөөг боловсруулахад, түүнчлэн олон улсын болон бүс нутгийн асуудлаар Филиппиний талтай хамтран ажиллахад бэлэн байна” гэж Си Жиньпин нэмж хэлжээ.
Хятад-Филиппиний харилцаа 2016 оны зун Өмнөд Хятадын тэнгис дэх газар нутгийн маргаантай асуудлаас үүдэлтэй хурцадмал байдлын дараа сүүлийн үед сайжирч байгаа юм.

2016 оны долдугаар сард Гааг дахь Арбитрын байнгын шүүх Филиппиний хүсэлтийг үндэслэн БНХАУ Өмнөд Хятадын тэнгис дэх газар нутгийг эзэмших нэхэмжлэл гаргах үндэслэлгүй гэж үзсэн байна. Спартли /Наньша/ бүлэг арлын маргаантай газрууд нь арлууд биш бөгөөд эдийн засгийн онцгой бүс байгуулах боломжгүй гэж шүүх шийджээ. Хятадын тал шүүхийн шийдвэрийг хүлээн зөвшөөрөөгүй байна.
Холбоотой мэдээ