Улаанбаатар
Жуулчдад зориулсан зуны тоглолт, ёслолын хуваарь
МОНГОЛЫН МЭДЭЭ | СОЁЛ УРЛАГ
Улаанбаатар /МОНЦАМЭ/. Энэ зун Нийслэлийн аялал жуулчлалын газраас Улаанбаатар хотыг жуулчдад ээлтэй хот болгох зорилгоор дараах ажлыг зохион байгуулна. Үүнд:
ТАЛЫН САЛХИ (2019.06.08-09)
Моторын дуунд нэгдсэн 800 дотоод гадаадын мотоциклчид төмөр хөлгөө хөлөглөн тав дахь жилдээ “Талын салхи-2019” олон улсын мото наадамд оролцоно. Мото наадмыг зургадугаар сарын 8,9-ний өдөр зохион байгуулах бөгөөд жанжин Д.Сүхбаатарын талбайд нээж төмөр хөлөгтний цуваа “Чингис хааны морьт хөшөөт цогцолбор” руу хөдөлнө.
Зохион байгуулагч: Монголын Чопперчин Ахан Дүүс НҮТББ, НЗДТГ, Нийслэлийн Аялал жуулчлалын газар
ДЭЭЛТЭЙ МОНГОЛ (2019.07.10)
Дээлтэй монгол наадам нь Монгол үндэстэн ястны хувцас, гоёл чимэглэлээ дэлхий нийтэд таниулан сурталчлахаар жанжин Д.Сүхбаатарын талбайд жил болгоны долдугаар сарын 10-нд зохион байгуулдаг. Тус наадмын үеэр монгол үндэсний хувцастай иргэдийн баярын жагсаал, ардын урлагийн тоглолт, үндэсний хувцасны загварын үзүүлбэр болон монгол үндэсний дээл, хувцас хэрэглэл, монгол гэр, гар урлалын бүтээгдэхүүний үзэсгэлэн худалдааг сонирхох боломжтой.
БОГДХАН УУЛЫН Трайл (2019.07.28)
Монгол Улсад хоёр дахь удаагаа Ултра Трайл төрлийн уул ус, тал нуруу, хот сууринг дамжин гүйх гүйлтийн тэмцээн Долдугаар сарын 28-нд Богдхан ууланд зохион байгуулагдана. Тогтсон зай, засмал замд цагтай уралдаж, уралдааны ялагч болон спортын амжилтын төлөө гүйхээс илүүтэйгээр байгалийн гоо үзэсгэлэн дунд өөрийгөө танин мэдэж, ялан дийлж замаа дуусгах нь тус тэмцээний зорилго юм. Тамирчид 10 км,21 км, 64 км-ийн зайд уралдана. Мөн 10км болон 21км-ийн зайд Хөл нүцгэн гүйлтийн тэмцээн болно.
Зохион байгуулагч: LUCENT Co., Ltd., Монголын хэт холын марафон гүйлтийн холбоо, Нийслэлийн Аялал жуулчлалын газар
“МОНГОЛЫН ТАЛ НУТАГ” ОЛОН УЛСЫН МАРАФОН ТЭМЦЭЭН (2019.09.08)
“Монголын тал нутаг” олон улсын марафон гүйлтийн тэмцээнийг анх 1996 онд Япон улсын иргэн Фүживара болон Кон Аяа нар анхлан санаачилж байсан түүхтэй. Монголын тал нутгаар япон болон бусад гадаад орнуудын 2500 гаруй хүн сонирхогчдын болон мэргэжлийн тамирчдын хагас марафоны зайд хурд хүчээ сорьдог. Тэмцээн есдүгээр сарын 8-нд Хүй долоон худагт болох бөгөөд тамирчид 3 км, 5 км, 10 км, хагас 21 км-ийн зайд уралдана.
Холбоотой мэдээ
