Улаанбаатар
N95 амны хаалтны тендерийг буцаах үүрэг өглөө
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Нийслэлийн Эрүүл мэндийн газраас зарласан N95 амны хаалтны тендертэй холбоотой асуудлаар Нийслэлийн Засаг дарга бөгөөд Улаанбаатар хотын захирагч Д.Сумьяабазар холбогдох албаны хүмүүсээс тайлбар авлаа.
Мөн олон нийтийн дунд үүсээд буй шүүмжлэлтэй асуудалд тайлбар өгч, уг тендерийг зарлаж, шалгаруулах ажлыг ЭМЯ руу буцаах хугацаатай үүргийг Нийслэлийн Эрүүл мэндийн газрын даргын үүргийг түр орлон гүйцэтгэгч Л.Зэндмаад өгөв.
Нийслэлийн Засаг дарга бөгөөд Улаанбаатар хотын захирагч Д.Сумьяабазар “Оношлуур, амны хаалт, хамгаалах хэрэгслийг ЭМЯ хариуцна. Бодлогын асуудлаа ЭМЯ өөрсдөө авахгүй яагаад нийслэл рүү явуулаад байгаа юм. Тиймээс амны хаалтны тендерийг ЭМЯ руу буцааж, ном журмын дагуу явсан эсэхэд хууль хяналтын байгууллагаар шалгуулаарай. Би үүнд ашиг сонирхол байна гэж үзэж байгаа. Бидэнд ачаалал мундаагүй. Ард түмний амьдрал, бизнесийнхний нөхцөл байдал, улсын төсөв ямар байгаа билээ. Тиймээс энэ асуудлаар ЭМЯ-ны хүмүүсээр тайлбарыг нь хийлгэ” гэлээ.
