Улаанбаатар
Олимпод оролцсон тамирчид энгэрийн тэмдгээ гардлаа
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Олон улсын олимпын хороо /ОУОХ/-ны 7 дахь ерөнхийлөгч Хуан Антонио Самаранчийн санаачилгаар олимпод оролцсон тамирчин бүрд энгэрийн тэмдэг гардуулдаг болоод 40 гаруй жил болжээ.
Уламжлал ёсоор Токиогийн олимпод улсаа төлөөлөн оролцсон тамирчдад лхагва гарагт энгэрийн тэмдгийг нь албан ёсоор гардуулан өглөө.
Энэхүү ёслолд олимпын тамирчдаас гадна МҮОХ-ны
ерөнхийлөгчийн бүрэн эрхийг хэрэгжүүлэгч Ч.Наранбаатар, ерөнхий нарийн бичгийн
дарга Э.Бадар-Ууган, Гүйцэтгэх зөвлөлийн гишүүн, МҮОХ-ны Тамирчдын комиссын
дарга Д.Отгондалай нар байлцав.
Энэ үеэр Олимпод
оролцогчдын холбооны тэргүүн, олимпын аварга Э.Бадар-Ууган: “Олимпын наадамд
оролцоно гэдэг тамирчин бүрд олдоод байдаггүй ховорхон хувь тохиол. Олимпод
оролцоно гэдэг бусад салбартай харьцуулахад докторын зэрэг хамгаалсантай дүйх
амжилт гэж олон улсад үздэг. Тиймээс та бүхэн олимпын наадамд оролцсондоо
бахархаж яваарай. Олимпод оролцогчдын холбоо цаашид цөөнгүй ажил хийхээр
төлөвлөж байгааг энэ ташрамд дуулгая” гэв.
Олимпод оролцогчдын
дэлхийн холбоо нь 90 гаруй ҮОХ-дыг эгнээндээ нэгтгэсэн бөгөөд 100 мянга гаруй
гишүүнтэй болжээ. Харин өдгөө энэхүү өнөр бүл Монголын 43 тамирчнаар эгнээгээ
тэлж байна.
Олимпын наадамд оролцсон тамирчид энгэрийнхээ тэмдгийг гардан авч, олон улсын холбоондоо бүртгэлтэй болох нь олон талын ач холбогдолтой. Тухайлбал, олон улсын холбоогоороо дамжуулан сургалт семинар болон тэтгэлэгт хөтөлбөрт хамрагдах, нийгмийн сайн сайхныг түгээх төсөл хөтөлбөр хэрэгжүүлэх зэрэг олон боломж нээгддэг юм байна.
