“Улаанбаатар марафон”-д оролцож буй шилдэг тамирчид

Монголын мэдээ | Спорт
bolor@montsame.mn
2022-05-28 12:12:03

Улаанбаатар /МОНЦАМЭ/. “Улаанбаатар марафон-2022” олон улсын гүйлт үргэлжилж байна.


Нийслэл хотын төв хэсгийг автомашины хөдөлгөөнөөс чөлөөлж, марафонд оролцогчид гүйхийн  сацуу иргэд чөлөөтэй зорчих, явган алхаж, дугуй, ролик, скүүтер унаж, биеэ чийрэгжүүлэх боломжийг олгосон.  Энэ удаагийн “Улаанбаатар марафон-2022” олон улсын марафон гүйлт хоёр жил дамнан үргэлжилсэн цар тахлын дараах нийтийг хамарсан спортын анхны наадам болж буйгаараа онцлогтой. Гүйлтэд Монголын нэр хүндтэй тамирчдаас гадна гадаадын 26 орны 150 гаруй гүйгч, тамирчид оролцож буй юм

“Улаанбаатар марафон-2022” марафонд оролцож буй дотоод, гадаадын нэр хүндтэй тамирчдын амжилтаас танилцуулж байна.

Үндэсний шигшээ багийн тамирчин, ОУХМ Цэвээнравдангийн Бямбажав


Тэрбээр “Рио-2016”, “Токио-2020” олимпын наадам, “Лондон-2017”, “Доха-2019” Дэлхийн аварга шалгаруулах тэмцээнд амжилттай оролцсон, “Ороген-2022” Хөнгөн атлетикийн дэлхийн аварга шалгаруулах тэмцээнд оролцох эрх авсан тамирчин юм.

Түүний марафон гүйлтийн дээд амжилт 2:16:18 сек.  

                        Үндэсний шигшээ багийн тамирчин, ОУХМ Дамбадаржаагийн Гантулга

Д.Гантулга “Рио-2016” олимпын наадам, 2014, 2018 оны Азийн аварга шалгаруулах тэмцээнд оролцож байсан. “Ороген-2022” Хөнгөн атлетикийн дэлхийн аварга шалгаруулах тэмцээнд оролцох эрх аваад байна.

Үндэсний шигшээ багийн тамирчин, ОУХМ Баярцогтын Мөнхзаяа


“Рио-2016”, “Токио-2020” олимпын наадам, “Лондон-2017”, “Доха-2019” Дэлхийн аварга шалгаруулах тэмцээнд оролцогч, 3000 м, 5000 м, 10000 м, хагас марафон, марафон гүйлтийн Монгол Улсын рекордын эзэн, “Улаанбаатар марафон” олон улсын гүйлтийн таван удаагийн аварга, Монгол Улсын 20 удаагийн аварга, “Ороген-2022” Хөнгөн атлетикийн дэлхийн аварга шалгаруулах тэмцээнд оролцох эрх авсан тамирчин. Түүний марафон гүйлтийн дээд амжилт 21095 м зайд 1:13:31 сек юм.

Кени Улсын бүтэн марафоны тамирчин Серой Андерсон Сайтоти


Итали Улсын “Венис-2021” марафонд 2:12:21 секундийн амжилтаар алтан медаль хүртэж байсан.  2020 онд Тайландад болсон “Amazing Thailand Marathon”-д 2:23:52 секундийн амжилтаар долдугаар байрт, “Шиамэн-2020” марафонд 2:13:47 секундийн амжилтаар  наймдугаар байранд тус тус шалгарсан, Кени Улсын шилдэг тамирчдын нэг.

Кени Улсын бүтэн марафоны тамирчин Киура Денис Мугенди


Тэрбээр “Chi Zhou-2019” тэмцээний алтан медальт, Итали Улсын “Палермо-2021” марафонд 2:23:54 секундийн амжилт, 2016 онд болсон “Чунгчин” олон улсын тэмцээнд 2:21:05 секундийн амжилт үзүүлж, шилдэг 20-д шалгарсан тамирчин юм.

Казахстан Улсын бүтэн марафоны тамирчин Айгараев Султан  Арманулы


“Шымкент 2021” марафонд 01:15:23 секундийн амжилтаар хоёрдугаар байр, Албан ёсны марафон гүйлтийн 10 зай, “Алма-Аты” марафон, “Иссык-Куль марафон”,  “Астана марафон” зэрэг марафонд амжилттай оролцсон Казахстан Улсын шилдэг тамирчдын нэг.

Казахстан Улсын бүтэн марафоны тамирчин Скендир Дархан

Тэрбээр “Алматы 2022” хагас марафонд тэргүүн  байр, “Залуу гүйгч уралдаан 2022” марафонд   болон “Копа 2022” марафонд тус бүр гутгаар байр, “Шымкент -2021” марафонд  тавдугаар байр,  “Туркестан 2021” марафонд зургадугаар байрын шагнал хүртсэн Казахстан Улсын нэр хүндтэй тамирчин юм.

Холбоотой мэдээ