ГОВЬ-АЛТАЙ: Алтай сум 24 цагийн эрчим хүчинд холбогдлоо

ОРОН НУТГИЙН МЭДЭЭ | ГОВЬ-АЛТАЙ
185@montsame.mn
2022-08-15 13:20:41

Говь-Алтай  /МОНЦАМЭ/. Говь-Алтай аймгийн Алтай сумын нарны цахилгаан станцын өргөтгөлийн ажил дуусч, ашиглалтад хүлээн авлаа.


Азийн хөгжлийн банкны “Сэргээгдэх эрчим хүчийг нэмэгдүүлэх төсөл”-ийн хүрээнд хэрэгжсэн Говь-Алтай аймгийн Алтай сумын нарны цахилгаан станцын өргөтгөлийн ажлыг холбогдох албаныхан хүлээн авсан юм. Нээлтийн үйл ажиллагаанд Эрчим хүчний дэд сайд М.Баярмагнай, УИХ-ын гишүүн Ш.Раднаасэд, Б.Энх-Амгалан, Говь-Алтай аймгийн Засаг дарга О.Амгаланбаатар, Алтай сумын Засаг дарга Д.Эрдэнэжаргал, албаны зочид төлөөлөгч болон сумын төвийн ард иргэд оролцлоо.


Төсөл хэрэгжсэнээр, төвийн эрчим хүчний нэгдсэн системд холбогдоогүй Монгол Улсын хамгийн сүүлийн сум болох Говь-Алтай аймгийн Алтай сумын цахилгаан хангамжийг нарны шавхагдашгүй эрчим хүчийг ашигласан сэргээгдэх эрчим хүчээр, цэнэг хураагуурын системийн хамгийн сүүлийн үеийн дэвшилтэт техник технологид тулгуурлан чанартай, найдвартай цахилгаан эрчим хүчээр 24 цагийн турш тасралтгүй хангах боломжтой бүрдлээ.


Мөн Монгол Улсын төсвийн хөрөнгө оруулалтаар “БНХАУ-аас 35 кВ-ын 70.7 км урттай цахилгаан дамжуулах агаарын шугам, дэд станц”, сумын төвийн 0.4 кВ-ын цахилгаан дамжуулах шугам сүлжээг шинэчлэх барилга угсралтын ажлуудыг эхлүүлж байна.

Холбоотой мэдээ