Улаанбаатар
ДОРНОГОВЬ: Соёлоороо гоёсон номын баяр
ОРОН НУТГИЙН МЭДЭЭ | ДОРНОГОВЬ
Сайншанд, 2024 оны тавдугаар сарын 20 /МОНЦАМЭ/. Дорноговь аймгийн Төв номын сангаас уламжлал болгон зохион байгуулдаг 35 дахь удаагийн “Номын баяр” үндэсний өв уламжлал ёс заншлаа дэлгэрүүлэх зорилготой “Илүү их уншъя” уриан дор өнөөдөр боллоо.
Сайншанд хотын ерөнхий боловсролын сургуулийн
сурагчид, багш нар, төрийн зарим байгууллага, алба хаагчид өнөөдөр үндэсний
дээлээ өмсөж, ёс заншлаа дээдлэн, ном судраа баринтаглан оролцсон юм. Энэ
жилийн номын баярын нэг онцлог нь өөрсдийн буй болгосон өв соёл, эх хэлийг илүү
сурах, танин мэдэх, соёлоороо бахархахад чиглэж байна.
Тухайлбал, аймгийн төв
талбайд номын орд өргөөг барьж, дотор нь орон нутгийн байгалийн сайхныг
харуулсан уран зураг, фото зураг, хуучин монгол бичгээрээ бичиж урласан төрөл
бүрийн уран бичлэг хийгээд төв Номын сангийн фондод байгаа хуучин монгол
бичгээр бичсэн номын дээжээс үзэгч, уншигчдад толилуулсан явдал юм.
Мөн Ноён хутагт Лувсанданзанравжаагийн бүтээл “Саран хөхөөний намтар”, “Гэсэрийн туужууд”, Ганжуур данжуур” “Асрагч нэртний толь”, “Тод үсгийн дурсгал” зэрэг монгол бичгээр бичсэн ховор номыг үзэгчид сонирхож байсан. Мөн Дорноговь аймгийн Улаанбадрах сумын харьяат Монгол Улсын Соёлын гавьяат зүтгэлтэн Арлааны Эрдэнэ-Очирын шүлгүүдээр уран уншлагын тэмцээн, хүүхдэд багачуудад зориулсан түргэн хэллэг, оньсон тоглоом, АХА тэмцээн, уран бичлэгийн үзэсгэлэн зэрэг оюун ухаан шингэсэн тоглоом наадгайг зохион байгуулж байна.
Энэ үеэр номыг дээдэлж номтой нөхөрлөдөг хүүхдүүдэд олгодог “Тэргүүний уншигч Д.Нацагдорж" тэмдгээр ахлах, дунд ангийн дөрөв, бага ангийн нэг хүүхдийг шагнасан бол “Олуулаа уншья” аяны тэргүүн байрт Сайншанд сумын ерөнхий боловсролын II сургуулийн 7б ангийн хамт олон шалгарчээ.
Аймгийн Төв номын сан 70 гаруй мянган номтой
бөгөөд энэ жил 2.5 сая төгрөгийн шинэ номоор фондоо баяжуулж, нийт 3800 орчим
уншигчид 7800 гаруй номоор үйлчилжээ.
