ЗАВХАН: Аймгийн 8 сум 100 жилийн ойн баяр наадмаа тэмдэглэлээ

myagmarsuren@montsame.mn

2024-07-24 11:27:40

Улиастай, 2024 оны долоодугаар сарын 24 /МОНЦАМЭ/. Энэ жил Завхан аймгийн 11 сумын тэгш ой тохиож байна.

Тухайлбал, хойд бүсийн Баянтэс сумын 100 жилийн ой 7 дугаар сарын 19, 20-нд, Баянхайрхан сум 7 дугаар сарын 20, 21-нд, Сонгино сум 7 дугаар сарын 21, 22-нд баяр наадмаа тэмдэглэжээ.

Сантмаргаз сум 7 дугаар сарын 26, 27-ны өдөр 100 жилийн ойн баяраа тэмдэглэнэ.

Хойд бүсийн сум болох Асгат сум 1984 онд байгуулагдсан бөгөөд 40 жилийн ойгоо 7 дугаар сарын 18, 19-ний өдөр тэмдэглэжээ.

Аймгийн говийн бүсийн сумдаас Дөрвөлжин сум 100 жилийн баяр наадмаа 7 дугаар сарын 20, 21-нд, Ургамал сум 7 дугаар сарын 19, 20-ны өдөр тэмдэглэлээ.

Завхан аймгийн урд бүсийн Отгон сум 100 жилийн ойн баяр наадмаа 7 дугаар сарын 18, 19-нд, Цагаанхайрхан сум 7 дугаар сарын 19, 20-нд Шилүүстэй сум 7-р сарын 17, 18-ны өдөр тэгш ойн баяр наадмаа хийсэн байна.

Хангайн бүсийн Яруу сум тэгш 100 жилийн ойн баяр наадмаа 7-р сарын 26, 27-ны өдөр тэмдэглэх юм.

Завхан аймгийн хэмжээнд энэ жил түүхэн 100 жилийн ойгоо тэмдэглэх 10 сум, тэгш 40 жилийн ой нь тохиож буй нэг сум байна.

Аймгийн Засаг даргын захирамжаар түүхэн тэгш ойг тогтоосон хугацаанд тэмдэглэх, үйл ажиллагааны төлөвлөгөөг батлан, 2024 оны төсөвт багтаан зохион байгуулахыг холбогдох баяр наадмыг зохион байгуулах хороо, сумдын Засаг дарга нарт үүрэг болгосны дагуу сумд баяр наадмаа тэмдэглэж байна.

Сумдын тэгш түүхэн ойд баруун бүсийн 2 дугаар тойргоос сонгогдсон УИХ-ын гишүүн Б.Түвшин, Э.Болормаа, О.Цогтгэрэл болон Монгол Улсын Ерөнхийлөгчийн Тамгын газрын дарга Г.Занданшатарын гэргий Дөрвөлжин сумын уугуул Г.Отгонгэрэл, Монгол Улсын Хөдөлмөрийн баатар, Шинжлэх ухааны доктор, УИХ-ын гишүүн агсан, Монголын Олимпын хорооны Ерөнхийлөгч, Уулын баяжуулах Эрдэнэт үйлдвэрийн анхны монгол ерөнхий захирал Ш.Отгонбилэг агсны гэргий, УИХ-ын гишүүн асан Д.Туяа түүний хүү О.Содбилэг нарын хүндэт зочид оролцжээ гэж аймгийн ЗДТГ-аас мэдээлэв.