Улаанбаатар
БАЯН-ӨЛГИЙ: Энэ сард олон жилийн дунджаас хүйтэн байна
ОРОН НУТГИЙН МЭДЭЭ | БАЯН-ӨЛГИЙ
Өлгий, 2024 оны аравдугаар сарын 1 /МОНЦАМЭ/. Баян-Өлгий аймгийн нутгаар 10 дугаар сарын агаарын олон жилийн дундаж температур нь 0-8 градус дулаан байдаг. Харин энэ жилийн хувьд олон жилийн дунджаас хүйтэн байна гэж аймгийн Ус, цаг уур, орчны шинжилгээний төвөөс мэдээллээ.
Тодруулбал, нэгдүгээр арав хоногийн эхэн, хоёрдугаар арав хоногийн сүүл, гуравдугаар арав хоногийн эхэн үед олон жилийн дунджаас 1-3 градусаар хүйтэн, харин нэгдүгээр арав хоногийн дунд, гуравдугаар арав хоногийн сүүлээр олон жилийн дунджаас бага зэрэг дулаан байна.
Сарын нийлбэр хур тунадас 6-12 мм ордог бол жилийн хувьд дунджийн орчим байх төлөвтэй. Нэгдүгээр арав хоногийн ихэнх хугацаанд, хоёрдугаар арав хоногийн эхэн болон дунд үед хур тунадас, уулархаг нутгаар цас орж салхи шуургатай байна.
Ташрамд, олон жилийн дундаж утга гэж Дэлхийн цаг уурын
байгууллагаас тогтоосноор 1981-2010 оны хоорондох тухайн цаг уурын
хэмжигдэхүүний дундаж утгыг авч үздэг юм.
