Улаанбаатар
СҮХБААТАР: Нэгдсэн эмнэлэг компьютер томографын аппараттай боллоо
ОРОН НУТГИЙН МЭДЭЭ | СҮХБААТАР
Баруун-Урт, 2024 оны
арванхоёрдугаар сарын 6 /МОНЦАМЭ/. Сүхбаатар аймгийн нэгдсэн эмнэлэг компьютер томографын
аппараттай боллоо. Эрүүл мэндийн яам, Дэлхий банкны 1,4 тэрбум төгрөгийн санхүүжилтээр G14-3 маркийн иж бүрэн аппаратыг Дүрс оношлогооны тасагт суурилуулж, байнгын ашиглалтад хүлээн авлаа.
Тус аймгаас жилд 1000 гаруй иргэн хөрш зэргэлдээ аймаг болон Улаанбаатар хот руу компьютерийн нарийн оношилгоонд орохоор явдаг байжээ. Харин энэ өдрөөс хойш иргэд орон нутагтаа компьютер томографын оношилгоонд орох нөхцөл бүрэн хангагдаж байгаа юм.
Төхөөрөмжийг ашиглалтад хүлээн авах ажиллагаанд аймгийн Засаг дарга М.Идэрбат, “Монгол Улсад Ковид-19 халдвараас урьдчилан сэргийлэх, хариу арга хэмжээ авах бэлэн байдлыг хангах” төслийн зохицуулагч С.Энхболд, аймгийн Эрүүл мэндийн газрын дарга М.Дэлхийцэцэг, аймгийн Нэгдсэн эмнэлгийн дарга Д.Алтантуяа нар оролцлоо. Цаашид төхөөрөмжийн хэвийн ажиллагааг хангах, хамгийн гол нь аппаратын хүчин чадлыг бүрэн ашиглаж, иргэдэд шаардлагатай үйлчилгээг цаг алдалгүй үзүүлж хэвших шаардлагатайг аймгийн Засаг дарга салбарын удирдлагуудад захилаа.
Аппаратын нийлүүлэх тендерт шалгарсан "Сетурнари" ХХК орон нутагт авчирч суурилуулсан
бөгөөд цаашид засвар үйлчилгээний ажлыг тодорхой
хугацаанд хариуцах юм.
