Ulaanbaatar
ДУНДГОВЬ: Сум, өрхийн эрүүл мэндийн төвүүд илүү цагаар ажиллаж байна
ОРОН НУТГИЙН МЭДЭЭ | ДУНДГОВЬ
Мандалговь, 2024 оны арванхоёрдугаар сарын 25 /МОНЦАМЭ/. Дундговь аймгийн хэмжээнд томуу, томуу төст өвчний
дэгдэлт их байгаа тул сум, өрхийн эрүүл мэндийн төвүүдийн ажиллах цагийн
хуваарийг сунгалаа.
Тодруулбал, аймгийн Эрүүл мэндийн газрын даргын 2024 оны
12-р сарын 23-ны өдрийн тушаалаар ажиллах цагийн хуваарийг гаргаж, сум, өрхийн
эрүүл мэндийн төвүүд ажлын өдөр 9:00-20:00 цаг, амралтын өдөр 10:00-12:00
цаг хүртэл ажиллах юм.
Томуу томуу төст өвчний дэгдэлт ямар байгаа талаар Сайнцагаан
сумын Өлзийт мандал ӨЭМТ-ийн төвийн дарга Т.Урангоогоос тодруулахад, “Томуу, томуу төст өвчний дэгдэлт ихэсч байна. Ялангуяа 2-4 настай хүүхдүүд илүү их өвчлөмтгий
байна. Манай эмнэлгийн хувьд 7 хоногт 239 үзлэг хийснээс 31.8 хувь, түүний
өмнөх 7 хоногт 264 үзлэг хийснээс 44.3 хувь, ирж буй дуудлагын 70 гаруй хувь нь
нь томуу, томуу төст өвчнөөр өвдсөн байна. Тиймээс иргэд, ялангуяа эцэг эх,
асран хамгаалагчид хүүхдийнхээ дархлааг сайн дэмжиж, дааруулахгүй, дулаан
байлгаж, халдвар хамгааллын дэглэмээ сайтар баримтлах хэрэгтэй” гэлээ.
