Ulaanbaatar
ДУНДГОВЬ: Сар шинийн баярын өдрүүдээр цаг агаар дулаан тогтуун байна
ОРОН НУТГИЙН МЭДЭЭ | ДУНДГОВЬ
Мандалговь, 2025 оны хоёрдугаар сарын 25 /МОНЦАМЭ/. Сар шинийн баярын өдрүүдэд Дундговь аймгийн нийт нутгаар дулаан байх
төлөвтэй байна.
Тус аймгийн УЦУОШТ-ийн цаг агаарын урьдчилсан мэдээгээр 2
дугаар сарын 27-ноос 3 дугаар сарын 4-нийг хүртэлх хугацаанд цас орохгүй, 27-ны
өдөр салхи баруун хойноос секундэд 9-14 метр хүрч ширүүсэх ба ихэнх хугацаанд
шөнөдөө 7-12 хэм хүйтэн, өдөртөө 1-6 хэм дулаан байна.
Одоогийн байдлаар тус аймгийн нийт нутгийн 10 гаруй хувьд
цастай, Адаацаг, Өндөршил сумын нутагт 1 см зузаан, Цагаандэлгэр,
Говь-Угтаал, Баянжаргалан, Дэрэн, Луус, Дэлгэрхангай сумын нутгаар бага
хэмжээний цастай гэж мэдээлжээ.
Ирэх гуравдугаар сарын урьдчилсан мэдээгээр сарын дундаж
агаарын хэм олон жилийн дунджаас дулаан байх ба олон жилийн дундаж нь аймгийн ихэнх
нутгаар 4-8 хэм хүйтэн байдаг. Тухайн сард олон жилийн дунджийн орчим буюу 0–2
мм хур тунадас орох төлөвтэй байна.
Өнөөдрийн байдлаар Дундговь аймгийн нийт нутгаар багавтар
үүлтэй, салхи баруун өмнөөс секундэд 7-12 метр, агаарын дундаж темпратур 0-5 хэмийн
хүйтэн байна.
