Ачаалал хэтэрсэн сургуулиудад онцгой зохицуулалт хийхийг Ерөнхий сайд үүрэг болголоо
МОНГОЛЫН МЭДЭЭ | УЛС ТӨР
Улаанбаатар, 2025 оны наймдугаар сарын 29 /МОНЦАМЭ/. Хичээлийн шинэ жил эхэлж буй энэ үед нэг ангид суралцах хүүхдийн тоо хэтрээд байгааг анхааралдаа авч, хүүхдийн тоогоор багшид нэмэгдэл хөлс тооцохыг Ерөнхий сайд Г.Занданшатар Боловсролын яам болон нийслэлийн удирдлагуудад үүрэг болголоо.
Тэрбээр Монголын боловсрол, шинжлэх ухааны үйлдвэрчний эвлэлийн холбооны төлөөллийг өнөөдөр хүлээн авч уулзан, хөдөлмөр, нийгмийн түншлэлийн гурван талт 2023-2025 оны хэлэлцээрийг үнэлж, биелэлтийг дүгнэн Засгийн газрын хуралдаанд танилцуулахыг даалгасан юм.
2025-2026 оны хичээлийн жилд урьдчилсан байдлаар сургуулийн өмнөх боловсролд 300 орчим мянган хүүхэд суралцана. Харин ерөнхий боловсролын сургуульд 830 орчим мянган хүүхэд суралцах бөгөөд энэ нь өмнөх жилийнхээс 30 мянга орчмоор нэмэгдсэн үзүүлэлт юм.
Боловсролын салбарын урсгал зардалд 2025 онд 3.8 их наяд төгрөг баталсны 70 орчим хувь буюу 2.6 их наяд төгрөг нь цалингийнх юм. Боловсролын салбар 2022 оноос бүтээмж, ур чадварт суурилсан цалин хөлсний, гүйцэтгэлийн үнэлгээний тогтолцоог хэрэгжүүлж байгаа. Ингэснээр багш нарын дундаж цалин нэмэгдсэн ч ЕБС-ийн 1-5 жил ажилласан залуу багш нарын цалин бага, үндсэн цалин нь нэг сая 488 мянган төгрөг байна. Багш нарын 52 орчим хувь нь 15-40 хувийн урамшууллыг сар бүр тооцож, улиралд нэг удаа авч байна.
Монголын боловсрол, шинжлэх
ухааны үйлдвэрчний эвлэлийн холбооны төлөөлөгчид ялангуяа, залуу багш
нарын үндсэн цалинг нэмэх, багшийн хөгжил, нийгмийн асуудал, орон сууцны
хангамжид анхаарахыг хүсэв. Нийслэлийн зарим сургуулийн нэгдүгээр ангийн
нэг ангид 70 хүүхэд хуваарилсан байна. Анги даасан багш нарын ажлын ачаалал
их байгаад анхаарах хэрэгтэй гэсэн багш нарын шаардлагыг Ерөнхий сайдад
уламжиллаа.
Багшийн хөгжлийн гурван жилийн төлөвлөгөө боловсруулж, багшийн дундаж цалинг нэмэхэд анхаарч, Засгийн газар “Орлогод нийцсэн орон сууцны хөтөлбөр” хэрэгжүүлэхээс гадна багш нарыг дэмжих тусгай хөтөлбөр гаргахаа Ерөнхий сайд Г.Занданшатар илэрхийлэв.
Боловсролын салбарт цахимжилтыг эрчимжүүлж, “Багшлахуйгаас суралцахуй” тогтолцоонд шилжих, ингэснээр багш, ажилтны цалин хөлсний тогтолцоог өөрчлөх учиртайг хэллээ. Засгийн газрын хамгийн том МЕГА төсөл бол хүний хөгжил учир боловсролын чанар, хүртээмжийг сайжруулахад онцгой анхаарна. Засгийн газар 2026 оныг Боловсролыг дэмжих жилээр зарласан. Иймд багш нарын цалин хөлс, нийгмийн баталгаанд анхаарч, тогтвор суурьшилтай ажиллах нөхцөлийг сайжруулахын төлөө ажиллаж байгаагаа илэрхийлжээ.