“Орон нутгийн зам-хөдөлгөөний соёл” аян эхэллээ

ОРОН НУТГИЙН МЭДЭЭ | ОРХОН
orkhon@montsame.mn
2019-06-15 19:59:57
oyuka_hu@yahoo.com

Орхон /МОНЦАМЭ/  Орхон аймгийн Замын Цагдаагийн тасаг хэвлэлийн бага хурал хийлээ. Хэвлэлийн хуралд аймгийн ЗДТГ, МХГ, Авто тээврийн төв, Нийгмийн эрүүл мэндийн төв, ОБГ зэрэг төрийн байгууллагын мэргэжилтнүүд оролцов. Монгол Улсын хэмжээнд  “Орон нутгийн зам-Хөдөлгөөний соёл” нэгдсэн арга хэмжээ эхэлж байна.

Энэ хүрээнд хот хооронд болон орон нутгийн замын хөдөлгөөний аюулгүй байдлыг хангахад Замын цагдаагийн тасаг бүрэн бүрэлдэхүүнээрээ хяналт тавьж ажиллах юм. Тус арга хэмжээ 10 дугаар сарын 1-ний өдрийг хүртэл үргэлжилнэ. Энэ хүрээнд төрийн холбогдох байгууллагууд Замын цагдаагийн тасагтай хамтран хот хооронд, орон нутгийн замын нийтийн тээвэр, замын хөдөлгөөнд тавих хяналтыг нэмэгдүүлэх юм. Мөн 24 цагийн үйл ажиллагаатай хяналтын цэгийг нэмж байгуулан, шаардлагатай газар хурд хэмжигч суурилуулахаар төлөвлөсөн байна.

Монгол Улсын хэмжээнд эхний таван сарын байдлаар зам тээврийн 579 осол, зөрчил бүртгэгджээ. Ослын улмаас 130 хүний амь насаа алдсан нь өнгөрсөн оны мөн үетэй харьцуулахад өссөн байна. Зам тээврийн ослын дийлэнх нь орон нутгийн замд гарч байгаа юм. Шалтгаан нь хурд хэтрүүлж, хамгаалах бүс хэрэглээгүй, хүүхдийг зориулалтын суудалд тээвэрлээгүй зэрэг гэж дүгнэжээ.

Холбоотой мэдээ